తనదైన నటనతో ప్రత్యేక గుర్తింపు తెచ్చుకున్న నటుడు 'జ్యోతిలక్ష్మీ' ఫేం సత్యదేవ్. ఇప్పటివరకు విభిన్న పాత్రల్లో నటించిన ఈయన ఇటీవల 'ఉమామహేశ్వర ఉగ్రరూపశ్య' చిత్రంతో మంచి బ్రేక్ అందుకున్నారు. ఇటీవలే 'ఈటీవీ'లో ప్రసారమయ్యే 'ఆలీతో సరదాగా' కార్యక్రమానికి హాజరైన సత్యదేవ్.. తన జీవితంలో ఎదుర్కొన్న ఓ ఆసక్తికర అనుభవాన్ని పంచుకున్నారు. ఓ సినిమా చిత్రీకరణ కోసం అఫ్ఘానిస్థాన్ వెళ్తే.. తనను మానవబాంబు అనుకుని అక్కడి పోలీసులు అరెస్టు చేశారని తెలిపారు.
- " class="align-text-top noRightClick twitterSection" data="">
"ఓ హిందీ సినిమా షూటింగ్ నిమిత్తం అఫ్ఘానిస్థాన్ వెళ్లాం. ఆ రోజు సోమవారం. అయితే మాకు షూటింగ్కు అనుమతి మంగళవారం నుంచి లభించింది. మంగళవారం అన్న సెంటిమెంట్తో తొలి రోజే చిన్న షూట్ ప్లాన్ చేశాం. నేను అటు ఇటు సరదాగా నడిచే సన్నివేశం అది. అయితే ఆ ప్రాంతంలో అప్పటి వరకు తొమ్మిది సార్లు బాంబు దాడులు జరిగాయట. మా చిత్రబృందం కూడా అక్కడ షూటింగ్ జరుగుతుంది అని తెలియని రీతిలో ప్లాన్ చేశారు. ఇక షాట్లో భాగంగా నేను, మరొక వ్యక్తి అటు ఇటూ తిరుగుతున్నాం. ఇంతలో మా మీద అనుమానంతో పెద్ద ఎత్తున పోలీసులు మమ్మల్ని చుట్టుముట్టారు. సంకెళ్లు వేసి విచారించడం మొదలుపెట్టారు. నేను కాస్ట్యూమ్లో ఉండటం వల్ల పాస్ పోర్ట్ రూమ్లో వదిలేశానని చెప్పా. కానీ నాతో వచ్చిన వ్యక్తి తన పాస్పోర్ట్ ఉందని చెప్పి సాక్స్లో చేయి పెట్టబోయాడు. మానవ బాంబ్ పెట్టుకున్న వాళ్లు కూడా ట్రిగ్గర్ను అక్కడే పెట్టుకుంటారట. దీంతో అప్రమత్తమైన అధికారులు తుపాకులు లోడ్ చేసి మాకు గురి పెట్టారు. ఇక మా పని అయిపోయింది.. నా జీవితంలో అదే ఆఖరి రోజు అని అనుకున్నా. మమ్మల్ని చంపెయ్యడానికి వాళ్ల దగ్గర కారణాలన్నీ అనుకూలంగా ఉన్నాయి. మా చిత్రబృందం ఇదంతా గమనించలేదు. ఆ తర్వాత రెండు దేశాల మధ్య పెద్ద చర్చలు జరిగి మమ్మల్ని వదిలేశారు. అనంతరం 40 రోజుల పాటు అక్కడే చిత్రీకరణ జరుపుకొన్నాం. కాకపోతే ఆ సినిమా ప్రస్తుతానికి ఆగిపోయింది" అని సత్యదేవ్ తన థ్రిల్లింగ్ అనుభవాన్ని పంచుకున్నారు.
ఇదీ చూడండి 'కేజీఎఫ్ 2' షూటింగ్ కోసం సంజయ్ దత్ రెడీ
