WIFI Connection Issue : టెక్నాలజీ విప్లవంతో ఇంటర్నెట్ వాడే వారి సంఖ్య విపరీతంగా పెరిగిపోయింది. అందరి చేతుల్లోకి మొబైల్ ఫోన్లు వచ్చేయడం వల్ల ఇంటర్నెట్ వాడకం తప్పనిసరిగా మారిపోయింది. సోషల్ మీడియా యాప్స్ వాడాలంటే ఇంటర్ నెట్ ఉండాల్సిందే. సినిమాలు, క్రికెట్ స్ట్రీమింగ్ చేయాలన్నా నెట్ తప్పనిసరి. ఇంటర్నెట్కు డిమాండ్ పెరగుతుండటంతో వినియోగదారుల దగ్గర నుంచి డేటా ప్యాకేజీల రూపంలో భారీగా డబ్బులు దండుకుంటున్నాయి టెలికం కంపెనీలు. దీనితో చాలా మంది వైఫై వాడేందుకు మొగ్గు చూపుతున్నారు. ఒక వైఫ్ కనెక్షన్తో ల్యాప్టాప్లు, టాబ్లెట్తో పాటు పలు స్మార్ట్ఫోన్లలోనూ డేటాను వాడుకునే సౌలభ్యం ఉండటంతో అందరూ దీనిపై ఆసక్తి చూపుతున్నారు. అయితే ఒక్కోసారి వైఫై కనెక్షన్ యూజర్లను ఇబ్బంది పెడుతుండటాన్ని గమనించే ఉంటారు. ముఖ్యమైన జూమ్ కాల్లో ఉన్నప్పుడు లేదా ఓటీటీలో కొత్తగా రిలీజైన ఒక సినిమానో, వెబ్ సిరీస్నో చూస్తుంటే వైఫై కనెక్షన్ ఆగిపోతే ఎలా ఉంటుందో ఊహించుకోండి. ఇలాంటి సమస్యను వర్క్ ఫ్రమ్ హోమ్ జాబ్ చేసేవాళ్లు కూడా తరచూ ఎదుర్కొంటూ ఉంటారు. మీరు వాడే వైఫై పదే పదే డిస్కనెక్ట్ అవుతోందా? అయితే దాన్ని ఎలా పరిష్కరించాలో ఇప్పుడు తెలుసుకుందాం..
1. ఎక్కువ డివైజ్లు కనెక్ట్ చేయొద్దు
WIFI connected devices list : ఒకప్పుడు ఇళ్లల్లో ఒక కంప్యూటర్ ఉంటే గొప్పగా భావించేవారు. కానీ ఈ రోజుల్లో ఇంట్లో వాడే టెక్ ప్రొడక్ట్ల జాబితా పెరిగిపోయింది. స్మార్ట్ ఫోన్ల దగ్గర నుంచి ఐప్యాడ్స్, స్మార్ట్ టీవీలు లాంటివి అందరి ఇళ్లలోకీ వచ్చేశాయి. అయితే ఇన్ని డివైజ్లు ఒకేసారి వైఫైకి కనెక్ట్ చేస్తే సమస్యలు తప్పవని టెక్ ఎక్స్పర్ట్స్ అంటున్నారు. ఎక్కువ డివైజ్లు వైఫైకి కనెక్ట్ చేస్తే డేటా స్పీడ్ తగ్గడంతో పాటు ఒక్కోసారి కనెక్షన్ పోయే అవకాశం ఉందని చెబుతున్నారు. కనుక మీ డివైజ్ల్లో ఏది వాడట్లేదో చూసి, దాన్ని డిస్కనెక్ట్ చేయాలి. మీ వైఫై కనెక్షన్తో ఇరుగు పొరుగు వాళ్లూ కనెక్ట్ అయ్యే అవకాశం ఉంది. కనుక తరచూ వైఫై పాస్వర్డ్ మారుస్తూ ఉండాలి. దీని వల్ల వైఫై మిస్ యూజ్ కాకుండా ఉంటుంది. ఒక వేళ అవసరమైతే మీరు వినియోగించే డివైజ్లను రీజాయిన్ కూడా చేసుకోవచ్చు. అందుకు బ్రాడ్ బ్యాండ్స్ను తగ్గిస్తే సరిపోతుంది. ఇంటర్నెట్ వేగం ఎక్కువగా ఉండాలంటే బ్యాండ్ను 6 గిగా హెడ్జెస్ ఉండేలా సెట్ చేసుకోవాలి. కనెక్షన్ సమస్య వేధిస్తే మాత్రం దీన్ని 2.4 గిగా హెడ్జెస్కు మార్చుకోవాలి. దీని వల్ల వైఫై రేంజ్ పెరుగుతుంది. కానీ డేటా స్పీడ్ తగ్గుతుంది. ఇంటర్నెట్ చాలా మెళ్లగా వస్తోందంటే వైఫై వాడకాన్ని తగ్గించాలి. గేమ్స్ లేదా సినిమాలు డౌన్లోడ్స్ చేస్తున్నట్లయితే ఆపాలి. అలాగే కనెక్టివిటీని అప్గ్రేడ్ చేయాలి. మీ ఇంటర్నెట్ స్పీడ్ ఎంతో తెలుసుకునేందుకు స్పీడ్ టెస్ట్ చేస్తే సరిపోతుంది. మీకు వస్తున్న డేటా స్పీడ్ కంటే ఇంకా వేగంగా ఇంటర్నెట్ కావాలని అనుకుంటే ఇంటర్నెట్ ప్రొవైడర్ను అడిగి హయ్యర్ స్పీడ్ ఉండే ప్లాన్కు మారవచ్చు.
2. రౌటర్ ఎక్కడ ఉంచారో చూస్కోండి!
Move objects away from your router : వైఫై ఫెయిల్యూర్కు ఎక్కువగా రౌటర్లో ఉండే సమస్యలే కారణమని నిపుణులు అంటున్నారు. రౌటర్ను ఇరుగ్గా లేదా సిగ్నల్ రాని చోట పెడితే ఇంటర్నెట్ స్పీడ్ రాదని చెబుతున్నారు. గాలి తగిలే చోట, సిగ్నల్ ఎక్కడైతే ఎక్కువగా వస్తుందో చూసుకొని అక్కడ రౌటర్ను ఉంచితే సరిపోతుందని నిపుణులు సూచిస్తున్నారు. మీరు వాడే కంప్యూటర్, ల్యాప్టాప్, ట్యాబ్లెట్, మొబైల్ ఫోన్లకు వైఫై రౌటర్ దగ్గర్లో ఉండేలా చూసుకోవాలి. అదే సమయంలో గాజుతో తయారు చేసిన వస్తువులను దీనికి దూరంగా ఉంచాలి.
3. ఆ అప్లికేషన్ వాడాల్సిందే
WIFI analyzer app : వైఫై కనెక్షన్ను వాడే చాలా మంది.. రౌటర్లను తమ ఫోన్లు, బ్లూటూత్ డివైజ్లు, స్మార్ట్ టీవీల పక్కనే పెడతారు. ఈ డివైజ్లకు రౌటర్ కాస్త దగ్గరగా ఉంటే సరిపోతుంది. కానీ వాటి పక్కనే పెట్టొద్దని నిపుణులు చెబుతున్నారు. దీని వల్ల సిగ్నల్ డ్రాపింగ్ సమస్య ఏర్పడుతుందట. తక్కువ దూరంలో మూడ్నాలుగు వైఫై రౌటర్లు ఇన్స్టాల్ చేసి ఉన్నా ఈ సమస్య వస్తుందట. దీనికి వైఫై అనలైజర్ అలాంటి అప్లికేషన్ను వాడటమే పరిష్కారమని నిపుణులు సూచిస్తున్నారు. ఈ అప్లికేషన్ ద్వారా ఏ వైఫై ఛానల్ తక్కువగా వినియోగిస్తారో తెలుసుకొని దాన్నే ఎంచుకుంటే సరిపోతుంది. అలాగే బ్యాండ్విడ్త్ను కూడా తగ్గించుకోవాలి.
4. అప్డేట్ చేస్తూ ఉండాలి
Router app update : ప్రింటర్స్ లాంటి ఎలక్ట్రానిక్ డివైజ్ల్లో ఎప్పటికప్పడు డ్రైవర్స్ను అప్డేట్ చేస్తూ ఉండాలి. మీరు ఒకే డివైజ్ను వాడుతున్నా వైఫై కనెక్షన్ డ్రాప్ అవుతూ ఉంటే.. వెంటనే మీరు వాడే డివైజ్ డ్రైవర్స్ను అప్ డేట్ చేశారా, లేదా చెక్ చేసుకుంటే సరిపోతుందని నిపుణులు చెబుతున్నారు.
5. రౌటర్కు రెస్ట్ తప్పనిసరి
How to reboot router WIFI : కొందరు వినియోగదారులు ఎలక్ట్రానిక్ ఉత్పత్తులను విపరీతంగా వాడుతుంటారు. వైఫై ఇంటర్నెట్ను ఇలాగే ఇష్టం వచ్చినట్లు వాడి డేటా స్పీడ్ను చేజేతులా తగ్గిస్తూ పోతారు. సెల్ఫోన్స్, ల్యాప్టాప్స్ లాంటి పలు డివైజ్లను కనెక్ట్ చేసి ఫుల్ స్పీడ్లో గంటల కొద్దీ వాడుతుంటారు. దీని వల్ల రౌటర్పై తీవ్రమైన ఒత్తిడి కలుగుతుంది. కనుక కుదిరినప్పుడల్లా రౌటర్, మోడెమ్ను 30 సెకన్ల పాటు ఆఫ్ చేసి తిరిగి ఆన్ చేయాలి.
6. టెక్నాలజీకి తగ్గట్లు అప్గ్రేడ్ కావాల్సిందే
Technology Upgradation : పైన చెప్పిన సూచనలు పాటిస్తే వైఫై కనెక్షన్స్లో ఎలాంటి సమస్యలు రావు. ఒకవేళ వైఫై కనెక్షన్లో గనుక ఇబ్బందులు ఎదురైతే వెంటనే టెక్నీషియన్ను కలవాలి. అవసరమైతే రౌటర్, మోడెమ్ లాంటివి మార్చడం, కొత్త టెక్నాలజీకి అప్గ్రేడ్ అవ్వాలని నిపుణులు సూచిస్తున్నారు. కొత్త సేవలకు తగ్గట్లు పాత రౌటర్లు పనిచేయాలంటే అన్ని వేళలా కుదరని పని అని అంటున్నారు. రీసెట్ చేసినా, రీస్టార్ట్ చేసినా రౌటర్ మొరాయిస్తే, వెంటనే కొత్త దానికి మారిపోతే బెటర్ అని నిపుణులు చెబుతున్నారు.
