Artemis 1 Mission : నాసా ప్రతిష్ఠాత్మకంగా చేపట్టిన 'ఆర్టెమిస్-1' ప్రయోగానికి ముచ్చటగా మూడోసారి షెడ్యూల్ ఖరారైంది. ఇప్పటికే రెండు సార్లు వాయిదా పడగా.. తాజాగా నవంబరు 14న ఈ రాకెట్ను ప్రయోగించేందుకు సిద్ధమైంది. ఇటీవల ఫ్లోరిడాలో హరికేన్‌ సంభవించడం వల్ల రాకెట్ను లాంచ్ ప్యాడ్‌ నుంచి హాంగర్‌కు తరలించి.. తనిఖీలు పూర్తిచేసి కొత్త తేదీని ఖరారు చేసినట్లు నాసా వెల్లడించింది. ఆ రోజు వీలు కాకపోతే నవంబరు 16 లేదా 19న ప్రయోగం చేపట్టనున్నారు.
ఆగస్టు 29న ఫ్లోరిడాలోని కెన్నెడీ అంతరిక్ష కేంద్రం నుంచి ఈ రాకెట్ నింగిలోకి దూసుకెళ్లాల్సి ఉండగా.. ఇంధన లీకేజీ సమస్యతో నిలిచిపోయింది. అనంతరం సెప్టెంబరు 3న మరోసారి షెడ్యూల్ చేయగా.. మరోసారి ఇంధన లీకేజీ తలెత్తింది. చంద్రుడిపై శాశ్వత నివాసానికి పునాదులు వేసే ప్రయత్నాల్లో భాగంగా ఈ ప్రయోగం చేపడుతుండగా.. ప్రస్తుతం మాత్రం అందులో ఉన్న ఓరియన్‌ క్యాప్సూల్‌ మానవరహితంగానే చంద్రుడి కక్ష్యలోకి వెళ్లి రానుంది. 2024లో ఆర్టెమిస్-2, 2025లో ఆర్టెమిస్-3 ప్రయోగాలను నాసా చేపట్టనుంది.
ఇవీ చదవండి: ఎగిరే ట్యాక్సీల టెస్ట్ సక్సెస్. గంటకు 130 కిలోమీటర్ల వేగం
