కాలంతో పాటుగా మారుతున్న ప్రపంచంలో ప్రతి ఒక్కరూ స్మార్ట్గా ఉండేందుకు ప్రయత్నిస్తున్నారు. ప్రతి ఒక్కరూ స్మార్ట్ ఫోన్, స్మార్ట్ వాచ్, వైర్లెస్ బ్లూటూత్లు, ఇయర్బడ్స్ వంటివి వాడుతున్నారు. అయితే కొన్నిసార్లు వాచ్, ఇయర్బడ్స్ను ఇంట్లోనే మర్చిపోతుంటారు. అలాంటి వారికోసమే హూవావే కంపెనీ అత్యాధునిక ఫీచర్లతో కూడిన స్మార్ట్వాచ్ను ఆవిష్కరించింది. దీని ప్రత్యేకత ఏంటంటే.. పైకి వాచ్లానే కనిపించే ఇందులో ఇయర్బడ్స్ కూడా ఉంటాయి.
చూడటానికి అది స్మార్ట్ వాచ్ లాగే కనిపిస్తుంది. కాని దాని కింద ఉన్న ఓ బటన్ నొక్కితే చాలు వెంటనే డయల్ ఓపెన్ అవుతుంది. బుల్లి ఇయర్ బడ్స్ కనిపిస్తాయి. ఇలా ఇయర్ బడ్స్ కేస్లా ఉపయోగపడే ఈ టూ ఇన్ వన్ స్మార్ట్ వాచ్ ప్రస్తుతం నెట్టింట హల్చల్ చేస్తోంది. చైనాలో స్మార్ట్ ఫోన్లకు కేరాఫ్ అడ్రస్గా నిలుస్తున్న హువావే అనే సంస్థ ఈ సరికొత్త ఐడియాతో ముందుకొచ్చింది. హూవావే సొంత ఓఎస్తో తయారైన ఈ స్మార్ట్ వాచ్ను 2022 డిసెంబర్ 2న లాంచ్ చేస్తామని అనుకుంది కానీ.. కొన్ని కారణాల వల్ల దాన్ని వాయిదా వేసింది. అయితే మళ్లీ దీన్ని మార్చి 1న యూకే మార్కెట్లోకి తీసుకువస్తున్నట్లు హూవావే సంస్థ ప్రకటించింది.
ఫీచర్స్ ఏంటంటే..?
ఈ 'హువావే వాచ్ బడ్స్' సాధారణమైన స్మార్ట్వాచ్ లానే కనిపిస్తుంది. దీనిలో బయటకు కనిపించని విధంగా ఓ జత 'ట్రూ-వైర్లెస్ స్టీరియో(TWS)' ఇయర్ బడ్స్ ఇమిడి ఉంటాయి. దీంతో పాటు స్మార్ట్ వాచ్లో 466x466 పిక్సెల్స్ రెజల్యూషన్తో 1.43 అంగుళాల అమోలెడ్ టచ్స్క్రీన్ ఉంటుంది. 24/7 గంటలు పనిచేసే ఆప్టికల్ హార్ట్ రేట్ సెన్సార్ 5.0, స్మార్ట్ ఎస్పీఓ2 ట్రాకింగ్, ట్రూస్లీప్ 3.0 వంటి ఫిట్నెస్ ఫీచర్లు ఉన్నాయి. ఐపీ54తో పనిచేసే వాటర్ రెసిస్టెన్స్ సిస్టమ్ ఉండి నీటిలో కూడా పనిచేస్తుంది.
వాచ్ లోపల ఇయర్బడ్స్ ఉంచడానికి వీలుగా మాగ్నెటిక్ డిజైన్తో తయారు చేసిన పాప్-అప్ కవర్ ఉంటుంది. ఈ చిన్న ఇయర్బడ్స్లో అడాప్టివ్ ఐడెంటిఫికేషన్ టెక్నాలజీ ఉంటుంది. వీటిని చెవిలో పెట్టుకోగానే ఎడమ లేదా కుడి చెవా అని గుర్తు పట్టి దానికి అనుగుణంగా వాల్యూమ్ను సర్దుబాటు చేసుకుంటుంది. దీనిలో మైక్రోఫోన్లను అమర్చి సౌండ్ క్వాలిటీని సర్దుబాటు చేస్తారు. ఇందులో ఏఐ నాయిస్ క్యాన్సిలేషన్ కూడా ఉంది. ఇది గాలి సౌండ్ను కూడా తగ్గిస్తుంది. నాయిస్ క్యాన్సిలేషన్ ఆన్చేసి ఉంటే మాత్రం కేవలం నాలుగు గంటలే పనిచేస్తాయి. స్మార్ట్ వాచ్ బ్యాటరీ ఫుల్ ఛార్జ్తో మూడు రోజుల వరకు వాడుకోవచ్చు.
మార్చి 1 నుంచి ఈ స్మార్ట్ వాచ్ను యూకే మార్కెట్లో అందుబాటులోకి తీసుకువస్తున్నట్లు హూవావే సంస్థ ప్రకటించింది. బ్రిటిష్ కరెన్సీ ప్రకారం దీని ధర 449.99 పౌండ్లు. అంటే భారతీయ కరెన్సీ ప్రకారం దాదాపు రూ.45,000 ఉంటుంది. యూకేలో ఈ వాచ్ కావల్సిన వారు ముందుస్తు బుకింగ్లు చేసుకోవచ్చని తెలిపింది. అయితే ఈ వాచ్ భారత్ మార్కెట్లో ఎప్పటి నుంచి అందుబాటులోకి వస్తుందో హువావే వెల్లడించలేదు.
