Dangerous malware SpinOK : గూగుల్ ప్లేస్టోర్లోని దాదాపు 100కి పైగా యాప్స్లో ఓ సరికొత్త మాల్వేర్ ఉన్నట్లు డాక్టర్ వెబ్ అనే సైబర్ సెక్యూరిటీ నిపుణులు గుర్తించారు. ఈ కొత్త మాల్వేర్ను 'స్పిన్ఓకే'గా పేర్కొంటున్నారు. ఆండ్రాయిడ్ యూజర్లు తక్షణమే ఈ మాల్వేర్ సోకిన యాప్స్ను తమ ఫోన్ల నుంచి తొలగించాలని వారు హెచ్చరిస్తున్నారు.
SpinOK : ఇది స్పైవేర్ గురూ!
'స్పిన్ఓకే' మాల్వేర్ సోకిన యాప్స్ అన్నీ కలిపి దాదాపుగా 40 కోట్ల వరకు గూగుల్ ప్లేస్టోర్ నుంచి డౌన్లోడ్ అయినట్లు డా.వెబ్ నిపుణులు పేర్కొన్నారు. ఈ మాల్వేర్ ఒక ఎడ్వర్టైజ్మెంట్(ప్రకటన) ఎస్డీకే ద్వారా మిగతా యాప్స్లోకి ప్రవేశించిందని వారు చెబుతున్నారు. ఇక్కడ మరింత ప్రమాదకరమైన విషయం ఏమిటంటే ఇది ఒక స్పైవేర్గా పనిచేస్తోందని నిపుణులు హెచ్చరిస్తున్నారు.
ఆశపడితే... దెబ్బైపోతారు!
ఆన్లైన్ మోసగాళ్లు ముఖ్యంగా మినీ గేమ్స్ ద్వారా 'డైలీ రివార్డులు' అనే ఆశ చూపిస్తూ యూజర్లను ఆకట్టుకుంటారు. కొన్ని టాస్క్లు ఇచ్చి, వాటిని పూర్తి చేసిన వారికి ప్రైజ్ మనీ ఇస్తామని ఊరిస్తారు. వీటికి ఆశపడి యూజర్లు ఎప్పుడైతే ఈ మాల్వేర్ సోకిన యాప్స్ వాడుతారో... అప్పుడు వారి డివైజ్ల్లోని ప్రైవేట్ డేటా మొత్తం చోరికి గురవుతుంది. ముఖ్యంగా రిమోట్ సర్వర్లలోకి యూజర్ల డేటా మొత్తం వెళ్లిపోతుంది. అందుకే డైలీ రివార్డుల కోసం ఆశపడితే.. మొదటికే మోసం వస్తుందని గుర్తించాలి.
SpinOK effected apps :
గూగుల్ ప్లేస్టోర్లోని దాదాపు 101కి పైగా యాప్స్లో స్పిన్ఓకే ఎస్డీకే ఉన్నట్లు డాక్టర్ వెబ్ ప్రకారం పేర్కొంది. వాటిలోని ప్రధానమైన యాప్స్ లిస్ట్ మీ కోసం...
⦁ Noizz: ఇది వీడియో ఎడిటర్ విత్ మ్యూజిక్ యాప్ (10 కోట్ల డౌన్లోడ్స్)
⦁ Zapya: ఫైల్ ట్రాన్స్ఫర్, షేర్ యాప్ (10 కోట్ల డౌన్లోడ్స్)
⦁ VFly: వీడియో ఎడిటర్, వీడియో మేకర్ యాప్ (5 కోట్ల డౌన్లోడ్స్)
⦁ MVBit: MV వీడియో స్టేటర్ మేకర్ యాప్ (5 కోట్ల డౌన్లోడ్స్)
⦁ Biugo: వీడియో మేకర్, వీడియో ఎడిటర్ యాప్ (5 కోట్ల డౌన్లోడ్స్)
⦁ Fizzo Novel: ఆఫ్లైన్లో చదువుకునే యాప్ ( సుమారు కోటి డౌన్లోడ్స్)
⦁ Crazy Drop: ( సుమారు ఒక కోటి డౌన్లోడ్స్)
⦁ Cashzine: ఎర్న్ మనీ రివార్డుల యాప్ ( సుమారు ఒక కోటి డౌన్లోడ్స్)
⦁ CashEM: రివార్డుల యాప్ (50 లక్షల డౌన్లోడ్స్)
⦁ Tick: వాచ్ టు ఎర్న్ యాప్ (50 లక్షల డౌన్లోడ్స్)
అప్డేట్ చేయండి!
ప్రస్తుతం గూగుల్ ప్లేస్టోర్ నుంచి ఈ స్పిన్ఓకే సోకిన యాప్స్ కొన్ని తొలగించినప్పటికీ.. ఇంకా పూర్తి స్థాయిలో క్లీన్ వెర్షన్ వచ్చే వరకు ఇలాంటి యాప్స్ డౌన్లోడ్ చేసుకోవద్దని నిపుణులు హెచ్చరిస్తున్నారు. ముఖ్యంగా పైన పేర్కొన్న యాప్స్ మీ ఫోన్లో ఉంటే కచ్చితంగా వాటిని అన్ఇన్స్టాల్ చేసుకోండి. లేదంటే సరికొత్త వెర్షన్కు అప్డేట్ అవ్వండని నిపుణులు చెబుతున్నారు.
