Canada mass stabbing : కెనడాలో వరుస కత్తిపోట్ల ఘటనలు తీవ్ర చర్చనీయాంశంగా మారాయి. ఈ ఘటనల్లో 10 మంది మృతిచెందగా మరో 15 మంది గాయపడ్డారు. సస్కాచెవాన్‌ ప్రావిన్సులోని 13 ప్రాంతాల్లో 10 మంది మృతదేహాలను గుర్తించినట్లు పోలీసులు తెలిపారు. వెల్డన్ సమీపంలోని ఓ పట్టణంలోని ఓ వర్గానికి చెందిన వారిపై ఈ దాడులు జరిగినట్లు పోలీసులు తెలిపారు. వరుస ఘటనలతో సస్కాచెవన్‌ ప్రావిన్సులో అత్యవసర పరిస్థితిని విధించారు.
కత్తిపోట్లకు సంబంధించి ఉదయం నుంచి వరుసగా ఫోన్లు వచ్చినట్లు పోలీసులు వెల్లడించారు. ఈ దారుణాన్ని ఇద్దరు దుండగులు పాల్పడుతున్నట్లు అనుమానిస్తున్న పోలీసులు వారికోసం గాలింపు చేపట్టారు. ప్రజలు అప్రమత్తంగా ఉండాలని సూచించారు. కొంతమంది బాధితులను లక్ష్యంగా పెట్టుకుని ఈ దాడులకు పాల్పడిన దుండగులు.. మరికొంత మందిని యాదృచ్ఛికంగా దాడిచేసినట్లు భావిస్తున్నారు. కత్తిపోట్ల ఘటనల్లో గాయపడిన వారికి యుద్ధ ప్రాతిపదికన చికిత్స అందిస్తున్నట్లు వైద్యశాఖ అధికారులు వెల్లడించారు. ఈ దాడులు భయంకర, హృదయవిదారకమైనవిగా కెనడా ప్రధాని జస్టిన్ ట్రూడో అభివర్ణించారు. స్థానిక అధికారులతో పరిస్థితిని సమీక్షస్తున్నట్లు పేర్కొన్నారు.
ఇదీ చదవండి:
