Kim Jong Un Daughter : ఉత్తర కొరియా అధ్యక్షుడు కిమ్ జోంగ్ ఉన్‌ వారసులు ఎవరనే విషయం చర్చనీయాంశమైంది. ఇటీవల తన కుమార్తెను తరచూ బయటకు తీసుకొస్తున్న కిమ్.. ఆమెకే తన పగ్గాలు అప్పగిస్తారని ప్రచారం జరుగుతోంది. కిమ్ రెండో కూతురు చువేయ్‌ వయసు 9 నుంచి పదేళ్ల మధ్య ఉంటుంది. ఆమె అంటే కిమ్‌కు ఎనలేని ప్రేమ అని రాజకీయ విశ్లేషకులు చెబుతున్నారు. భార్య మినహా సాధారణంగా కుటుంబ సభ్యులు ఎవరినీ కిమ్ బయట ప్రపంచానికి చూపించడానికి ఇష్టపడరు. కానీ ఇటీవల తరచూ.. తన రెండో కూతురు చువేయ్‌ను అధికారిక కార్యక్రమాలకు బయటకు తీసుకొస్తున్నారు కిమ్. తాజాగా క్షిపణి శాస్త్రవేత్తలతో సమావేశానికి చువేయ్‌ను తీసుకెళ్లారు. ఈ మేరకు ఉత్తర కొరియా అధికారిక మీడియా చిత్రాలను విడుదల చేసింది. ఈ నేపథ్యంలో కిమ్ తర్వాత ఉత్తర కొరియా పగ్గాలను చువేయ్‌ చేపడతారనే చర్చ జరుగుతోంది.
గత వారం ఉత్తర కొరియా బాలిస్టిక్ క్షిపణి ప్రయోగాన్నితల్లిదండ్రులతో చువేయ్‌ వీక్షిస్తున్న చిత్రాలను తొలిసారి అధికారికంగా విడుదల చేశారు. వారం తిరగకుండానే తండ్రితో కలిసి క్షిపణి శాస్త్రవేత్తలతో ఆమె సమావేశమైన చిత్రాలను విడుదలచేశారు. కొరియా క్షిపణి శాస్త్రవేత్తలు, సాంకేతిక సిబ్బంది, అధికారులతో కిమ్, ఆయన రెండో కూతురు గ్రూప్‌ ఫోటో దిగారు. ఉత్తరకొరియా ప్రతిష్టాత్మకంగా తీసుకుని అభివృద్ధి చేస్తున్న వాసుంగ్‌-17 బాలిస్టిక్ క్షిపణికి ఈ శాస్త్రవేత్తలు, సిబ్బంది తుదిమెరుగులు దిద్దుతున్నారు.
ప్రియమైన కూతురు!
కొరియన్ సెంట్రల్ న్యూస్‌ ఏజెన్సీ(కేసీఎన్ఏ).. కిమ్ రెండో కుమార్తె ఆయనకు ఎంతో విలువైనదని పేర్కొంది. అత్యంత ప్రియమైన కూతురుగా అభివర్ణించింది. కిమ్ భార్య రిసోల్‌ జు అధికారిక వ్యవహారాల్లో తలదూర్చరు. కిమ్ తర్వాత అత్యంత శక్తివంతురాలిగా పేరున్న ఆయన సోదరి కిమ్ యో జోంగ్ మాత్రమే అధికారికంగా తన సోదరుడి తర్వాత అధికారిక కార్యక్రమాలను చూసుకుంటారు. స్టేట్‌ ఎఫైర్స్‌ కమిటీ సభ్యురాలిగా, సమాచార, ప్రచార విభాగం డిప్యూటీ డైరెక్టర్ వంటి పలు పదవుల్లో కిమ్ యో జోంగ్ ఉన్నారు. విదేశీ వ్యవహారాలను కూడా ఆమె చూసుకుంటారని సమాచారం. తరచూ ఆమె అమెరికా, పొరుగునున్న దక్షిణ కొరియాలను పరుష పదజాలంతో విమర్శిస్తుంటారు.
కిమ్‌కు 2010, 2013, 2017లో సంతానం కలిగినట్లు.. దక్షిణ కొరియా మీడియా చెబుతోంది. కిమ్ మొదటి సంతానం కుమారుడని.. మూడో సంతానం కుమార్తె అని మాత్రమే దక్షిణ కొరియా మీడియా గతంలో వివరించింది. రెండో కుమార్తె గురించి ఇప్పటివరకూ ఎక్కడా పెద్దగా చర్చ జరగలేదు. నిజానికి కిమ్ జోంగ్ ఉన్‌కు ఎంతమంది సంతానం అనేది అధికారిక సమాచారం లేదు.
