Colombia Plane Crash : కొలంబియాలో ఓ చిన్న విమానం కుప్పకూలిన ఘటనలో పైలట్ సహా ఐదుగురు రాజకీయ నాయకులు దుర్మరణం పాలయ్యారు. వీరు కొలంబియా మాజీ అధ్యక్షుడు అల్వారో ఉరిబ్‌కు చెందిన పార్టీలో సభ్యులుగా ఉన్నారు. ఆ పార్టీ సమావేశంలో పాల్గొనడానికి విల్లావిసెన్సియో నుంచి బొగొటాకు విమానంలో ప్రయాణిస్తుండగా.. ఈ ప్రమాదం జరిగింది. ఈ ఘటనపై ఆ దేశ సివిల్‌ ఎవియేషన్‌ అథారిటీ దర్యాప్తు చేపట్టింది. ప్రమాదంలో మృతిచెందిన నాయకులకు కొలంబియా అధ్యక్షుడు గుస్తావో పెట్రో, పార్టీ నేతలు సంతాపం తెలిపారు.
హ్యాంగర్పైకి దూసుకెళ్లిన విమానం..
కొద్దిరోజుల క్రితం.. పోలండ్లో జరిగిన విమాన ప్రమాదంలో ఐదుగురు ప్రాణాలు కోల్పోయారు. ఎనిమిది మందికి గాయాలయ్యాయి. 'సెస్నా 208' అనే విమానం స్కైడైవింగ్ సెంటర్లోని హ్యాంగర్పైకి దూసుకెళ్లడం వల్ల ప్రమాదం జరిగింది. వాతావరణం అనుకూలించకపోవడం వల్ల ప్రమాదం జరిగిందని అధికారులు తెలిపారు.
నోవీ డవార్ రాష్ట్రం, గిమినా నాసియెల్స్క్ జిల్లాలోని క్రిసినో గ్రామంలో ఈ ప్రమాదం జరిగింది. ఘటనలో ప్లేన్ పైలట్ ప్రాణాలు కోల్పోయాడని అధికారులు తెలిపారు. వాతావరణం సరిగా లేదని హ్యాంగర్లో తలదాచుకున్న నలుగురు సైతం ఈ ప్రమాదంలో చనిపోయారని చెప్పారు. ఘటనలో ఎనిమిది మందికి గాయాలు కాగా, అందులో ఇద్దరి పరిస్థితి విషమంగా ఉందని వివరించారు. గాయపడిన వారిలో ఓ చిన్నారి సైతం ఉందని గవర్నర్ సిల్వెస్టర్ డాబ్రోవ్స్కీ తెలిపారు.
నేపాల్ ప్రమాదంలో 70 మంది మృతి
కాగా ఈ ఏడాది ప్రారంభంలో నేపాల్లో ఘోర విమాన ప్రమాదం జరిగింది. పొఖారా అంతర్జాతీయ విమానాశ్రయంలోని రన్వేపై ల్యాండ్ అవుతుండగా యతి ఎయిర్ లైన్స్‌కు చెందిన ఓ విమానం అదుపుతప్పి నదిలోయలోకి దూసుకెళ్లింది. ఈ ప్రమాదంలో 70 మందికి పైగా ప్రాణాలు కోల్పోయారు. ఇంజిన్ వైఫల్యం కారణంగానే ఈ ప్రమాదం జరిగిందని దర్యాప్తులో తేలింది. పాత విమానాశ్రయానికి.. పొఖారా అంతర్జాతీయ విమానాశ్రయానికి మధ్య ఈ ప్రమాదం జరిగింది. ప్రమాద సమయంలో విమానంలో ఉన్న 72 ప్రయాణికుల్లో 15 మంది విదేశీయులు ఉన్నారు. అందులో ఐదుగురు భారతీయులు ఉన్నట్లు అధికారులు గుర్తించారు. ఈ ప్రమాదానికి సంబంధించిన చిత్రాల కోసం ఈ లింక్పై క్లిక్ చేయండి. ఈ ఘటన లైవ్ వీడియో కోసం ఈ లింక్ను క్లిక్ చేయండి.
