ప్రపంచవ్యాప్తంగా లక్షలాది మంది ప్రాణాలను బలిగొంటున్న కరోనా మహమ్మారిని అంతం చేసేందుకు అన్ని దేశాలు విస్తృత చర్యలు చేపట్టాయి. ఇప్పటికే వైరస్ నియంత్రణ చర్యలు కఠినంగా అమలు చేస్తున్నాయి. శాస్త్రవేత్తలు సైతం ఈ ప్రాణాంతక వైరస్ను అంతమొందించేందుకు శాయశక్తులా ప్రయత్నిస్తున్నారు. ప్రపంచవ్యాప్తంగా 100 పరిశోధన బృందాలు ఇప్పటికే దాదాపు 12 రకాల వ్యాక్సిన్లను తయారు చేశాయి. కానీ ఇవన్నీ ప్రస్తుతం మానవులపై ప్రయోగ దశలోనే ఉన్నాయి. అయితే వీటిలో కొవిడ్-19ను పూర్తిగా అడ్డుకోగలిగే వ్యాక్సిన్ ఉంటుందని కచ్చితంగా చెప్పలేమంటున్నారు శాస్త్రవేత్తలు.
" ప్రపంచవ్యాప్తంగా ఎంతో మంది శాస్త్రవేత్తలం కరోనాకు వ్యాక్సిన్ కనిపెట్టేందుకు ప్రయత్నిస్తున్నాం. అయితే మేమందరం ఒకరికొకరు పోటీదారులం కాదు. కొవిడ్-19కు వ్యాక్సిన్ కనిపెట్టేందుకు జరుగుతున్న పోటీలో ఎంత మంది వీలైతే అంత ఎక్కువ మంది పాలుపంచుకోవాలని కోరుతున్నాం."
- డాక్టర్ ఆండ్రూ పొలార్డ్, ఆక్స్ఫర్డ్ శాస్త్రవేత్త
వ్యాక్సిన్కు ఇంకో ఏడాదిపైనే!
అన్నీ సవ్యంగా సాగితే.. మరో 12 నుంచి 18 నెలల్లో వ్యాక్సిన్ రూపొందించగలమని అంటున్నారు అమెరికా ప్రభుత్వ ముఖ్యసలహాదారుడు డాక్టర్ ఆంటోనీ ఫౌచీ. యూనివర్సిటీ ఆఫ్ పెన్సిల్వేనియాలో మనుషులపై పరీక్షించే డీఎన్ఏ ఆధారిత వ్యాక్సిన్ను గతనెలలోనే అభివృద్ధి చేశారు ఫౌచీ.
" ప్రస్తుతం చైనా, అమెరికా, బ్రిటన్, జర్మనీలో 8 నుంచి 11 వ్యాక్సిన్లను మనుషులపై ప్రయోగిస్తున్నారు. మే-జులై మధ్య కాలంలో మరో కొత్త రకం వ్యాక్సిన్ను మనుషులపై ప్రయోగించే అవకాశాలున్నాయి. ప్రస్తుతానికైతే కొవిడ్-19 వ్యాక్సిన్ పరిశోధనలో శాస్త్రవేత్తల కొరతేమీ లేదు."
- డాక్టర్ ఆంటోనీ ఫౌచీ, అమెరికా శాస్త్రవేత్త
ఒకదానికి రూపొందిస్తే మరోదానిపై...
కొన్ని రకాల వైరస్ల కోసం రూపొందించిన వ్యాక్సిన్లు ఇతర వైరస్లపై ప్రభావవంతంగా పనిచేస్తుంటాయని చెబుతున్నారు యేల్ స్కూల్ ఆఫ్ పబ్లిక్ హెల్త్ శాస్త్రవేత్త డాక్టర్ స్టెయిన్ వెర్ముండ్. అయితే కరోనా వైరస్కు బ్లూప్రింట్ లేదని, అందువల్లే వ్యాక్సిన్ను కనిపెట్టేందుకు ఎక్కవ సమయం పడుతోందని అంటున్నారు.
" 2003లో సార్స్ వైరస్కు వ్యాక్సిన్ కనుగొనేందుకు శాస్త్రవేత్తలు ప్రయత్నాలు చేసినప్పుడు.. కొన్ని రకాల కొత్త వైరస్లు, జంతు పరిశోధనలు భద్రతాపరమైన హెచ్చరికలు చేశాయి. ఆ తర్వాత సార్స్ కనుమరుగై.. వ్యాక్సిన్ ప్రయత్నాలకు నిధుల మంజూరు పూర్తిగా నిలిచిపోయింది. మెర్స్ వైరస్ వ్యాక్సిన్ ప్రయోగాలు కూడా మొదటిదశ పరీక్షల్లోనే ఆగిపోయాయి."
-డాక్టర్ స్టెయిన్ వెర్ముండ్, యేల్ స్కూల్ ఆఫ్ పబ్లిక్ హెల్త్ డీన్.
మరికొన్ని సంస్థల ప్రయత్నాలు
చైనాకు చెందిన సినోవాక్, సినోఫార్మ్ కంపెనీలు కరోనా వైరస్కు విరుగుడుగా అచేతన వ్యాక్సిన్(ఇన్యాక్టివేడెట్ వ్యాక్సిన్)లను పరీక్షిస్తున్నాయి. శరీరంలోని కరోనా వైరస్ను గుర్తించేలా వ్యాధి నిరోధక వ్యవస్థకు శిక్షణ ఇచ్చేందుకు మరికొన్ని వ్యాక్సిన్లను అభివృద్ధి చేస్తున్నారు శాస్త్రవేత్తలు. ఇందుకోసం స్పైక్ ప్రొటీన్ను శరీరంలోనే ఉత్పత్తి చేసేందుకు ప్రయత్నిస్తున్నారు. ఆక్స్ఫర్డ్ విశ్వవిద్యాలయ శాస్త్రవేత్తలు కూడా కొవిడ్-19 వ్యాక్సిన్ను ఆరు కోతులపై ప్రయోగించి విజయం సాధించారు. తాజాగా ట్రంప్ కూడా ఈ ఏడాది చివరికల్లా వ్యాక్సిన్ అందుబాటులోకి వచ్చే అవకాశాలున్నాయని ఆశాభావం వ్యక్తం చేశారు.
ఏది ఏమైనా.. వ్యాక్సిన్ అందుబాటులోకి వచ్చేందుకు మరికొన్ని నెలలు పట్టేలా ఉంది. ఈ నేపథ్యంలో వైరస్ బారినపడి విరుగుడు మందు కోసం ఎదురు చూడటం కంటే.. వైరస్ సోకకుండా జాగ్రత్తపడటమే మేలు.
