చైనాకు చెందిన సినోవాక్ టీకాను అత్యవసర వినియోగం కోసం ఆ దేశంలోని ఓ పట్టణంలో అందుబాటులోకి తెచ్చారు. ఈ టీకా రెండు డోసుల ధర 60 డాలర్లుగా నిర్ణయించారు. అంటే మన కరెన్సీలో దాదాపు రూ.4,399. ఈ విషయాన్ని జియాషిన్‌ నగరంలోని సెంటర్‌ ఫర్‌ డిసీజ్‌ కంట్రోల్‌ అండ్ ప్రివెన్షన్‌ వుయ్‌చాట్‌ విడుదల చేసిన ఒక ప్రకటనలో తెలియజేసింది. ఒక్కో వయల్‌ 29.75 డాలర్లకు విక్రయిస్తున్నారు. మొత్తం రెండు డోసులు తీసుకోవాలి. హైరిస్క్ గ్రూప్‌లోని వైద్యులు, సిబ్బందికి దీనిని ఇస్తున్నారు.
కరోనా కట్టడి కోసం జులై నుంచే అత్యవసర టీకా వినియోగాన్ని ప్రారంభించింది చైనా. ఈ టీకా ధరను ఎక్కడా అధికారికంగా ప్రకటించలేదు. ప్రస్తుతం వుయ్‌చాట్‌లో విడుదల చేసిన ధరలో కూడా సబ్సిడీలు కలిసి ఉన్నాయా లేదా అనే విషయంపై స్పష్టతలేదు. దీనిపై ఆ పట్టణ సీడీసీ వ్యాఖ్యానించేందుకు నిరాకరించింది. టీకా తయారీ సంస్థ సినోవాక్ కూడా ధరపై ఎలాంటి ప్రకటన చేయలేదు.
ఇటీవల ఇండోనేషియాకు చెందిన బయోఫార్మా కంపెనీ 40 మిలియన్‌ డోసుల కోసం సినోవాక్‌ను సంప్రదించింది. ఆ సమయంలో ఇండోనేషియా సంస్థ కొన్ని వివరాలను వెల్లడించింది. తమ దేశంలో ఆ టీకా అందుబాటులోకి వచ్చేసరికి ఒక్కో వయల్‌ 13.60 డాలర్లు పడుతుందని పేర్కొంది.
- ఇదీ చూడండి: 'మహిళల వివాహ కనీస వయసుపై త్వరలోనే నిర్ణయం'
