అగ్నిపర్వత విస్ఫోటనానికి ఐదుగురు బలి

న్యూజిలాండ్​లో ఓ అగ్నిపర్వతం పేలిన ఘటనలో మృతుల సంఖ్య ఐదుకు చేరింది. పలువురి ఆచూకీ గల్లంతైంది. అధికారులు సహాయక చర్యలు ముమ్మరం చేశారు.

న్యూజిలాండ్‌ వైట్​ ఐలాండ్​లోని ఓ అగ్ని పర్వతం పేలిన ఘటనలో మృతుల సంఖ్య ఐదుకు చేరింది. ఈ ప్రమాదంలో 20 మందికి పైగా గాయపడగా.. పలువురి ఆచూకీ గల్లంతైంది. అగ్నిపర్వత విస్ఫోటనంతో పొగ, దుమ్ము, ధూళి కిలోమీటర్ల దూరం వరకు వ్యాపిస్తున్నాయి.

అగ్నిపర్వత విస్ఫోటనంపై న్యూజిలాండ్ ప్రధాని జెసిండా ఆర్డెర్న్ స్పందించారు. ఘటనాస్థలంలో ముమ్మరంగా సహాయక చర్యలు చేపడుతున్నట్లు వెల్లడించారు. సమీప ప్రాంతాలవారు అప్రమత్తంగా ఉండాలని సూచించారు.

హెచ్చరికలు బేఖాతరు!

న్యూజిలాండ్ ప్రధాన భూభాగం నుంచి 50 కిలోమీటర్ల దూరంలో వైట్​ ఐలాండ్​ ఉంది. ఈ ద్వీపాన్ని స్థానిక మావోరీ భాషలో వాకారి అని కూడా పిలుస్తారు. ఇక్కడి అగ్నిపర్వతం క్రియాశీలంగా ఉందని ఇటీవలే శాస్త్రవేత్తలు హెచ్చరించినా... అక్కడికి పర్యటకులను అనుమతించడంపై విమర్శలు వెల్లువెత్తుతున్నాయి.

ఇదీ చూడండి: 'నిర్భయ' దోషుల కోసం ఆ​ జైలులో ఉరి తాళ్ల తయారీ?