భారత్- చైనా మధ్య ఇటీవల సరిహద్దు వివాదం చెలరేగినప్పటి నుంచి భారత్కు మద్దతుగా నిలిచిన అమెరికా మరో కీలక నిర్ణయం తీసుకోనున్నట్లు సూత్రప్రాయంగా తెలిపింది. ఆసియాలోని పలు దేశాలపై బెదిరింపులకు పాల్పడుతున్న చైనా పీపుల్స్ లిబరేషన్ ఆర్మీ ముప్పును ఎదుర్కొనేందుకు అంతర్జాతీయంగా తమ బలగాలను తరలించే అవకాశాన్ని సమీక్షిస్తున్నట్లు ప్రకటించింది.
ఇటీవల భారత్ సహా మలేషియా, ఇండోనేషియా, ఫిలిప్పీన్స్ వంటి దేశాలపై చైనా దుశ్చర్యకు పాల్పడుతున్నట్లు పేర్కొన్నారు.. అమెరికా విదేశాంగ శాఖ మంత్రి మైక్ పాంపియో. చైనాను ఎదుర్కోవటమే లక్ష్యంగా ప్రపంచవ్యాప్తంగా తమ బలగాల మోహరింపుపై సమీక్షిస్తున్నట్లు తెలిపారు.
జర్మన్ మార్షల్ ఫండ్ ఆధ్వర్యంలో వర్చువల్గా నిర్వహించిన బ్రసెల్స్ ఫోరమ్-2020 వేదికగా ఈ మేరకు చైనాకు హెచ్చరికలు పంపారు పాంపియో.
" చైనా పీపుల్స్ లిబరేషన్ ఆర్మీని ఎదుర్కోవటానికి ప్రపంచంలోని వివిధ దేశాల్లో మా బలగాల మోహరింపుపై సరైన స్థితిలో ఉన్నామని నిర్ధరించుకోబోతున్నాం. దానిని ఒక సవాలుగా భావిస్తున్నాం. అందుకు తగినన్ని వనరులను సిద్ధం చేస్తాం. నిర్ధిష్ట ప్రాంతాల్లో అమెరికా దళాలున్నాయి. ముఖ్యంగా భారత్, వియాత్నాం, మలేషియా, ఇండోనేషియా, దక్షిణ చైనా సముద్రం, ఫిలిప్పీన్స్ దేశాలకు చైనా కమ్యూనిస్ట్ పార్టీ నుంచి ముప్పు పొంచి ఉంది. ప్రస్తుతం అది మన ముందు ఉన్న ప్రధాన సవాలుగా భావిస్తున్నాం. ఏ ప్రాంతానికైనా ముప్పు ఎదురైతే ఇతర దేశాలు బాధ్యత తీసుకుని వారిని రక్షించాల్సిన అవసరం ఉంది. ప్రపంచవ్యాప్తంగా ఉన్న మా భాగస్వాములందరితో, ముఖ్యంగా ఐరోపాలోని మా స్నేహితులతో పూర్తి సంప్రదింపులు జరిపి బలగాల విస్తరణ చేయాలనుకుంటున్నాం."
- మైక్ పాంపియో, అమెరికా విదేశాంగ మంత్రి
అంతర్జాతీయంగా బలగాల విస్తరణ అధ్యక్షుడు డొనాల్డ్ ట్రంప్ ఆదేశానుసారంగానే సాగుతున్నట్లు తెలుస్తోంది. ట్రంప్ ఆదేశాలతో జర్మనీలోని 52 వేల బలగాలను 25 వేలకు తగ్గించాలని ఇటీవలే అమెరికా నిర్ణయించింది. దీనిపై విమర్శలు ఎదురైనా వాటిని ఖండించారు పాంపియో. ఆసియా దేశాల్లో సవాళ్లను ఎదుర్కొనేందుకే జర్మనీలోని బలగాలను తగ్గిస్తున్నట్లు చెప్పారు.
ఇదీ చూడండి: జీ-7 సదస్సు: భారత్కు ఆహ్వానం.. అయినా ఆచితూచి..
