కరోనాను కట్టడి చేసే విషయంలో అమెరికా దూకుడుగా ముందుకు సాగుతున్నట్లు చెప్పారు అధ్యక్షుడు డొనాల్డ్ ట్రంప్. ఈ క్రమంలోనే భారత్ సహా 10 దేశాల కంటే అత్యధికంగా 4.18 మిలియన్ల మందికిపైగా కొవిడ్ పరీక్షలు నిర్వహించినట్లు పేర్కొన్నారు.
"మేము ప్రపంచ దేశాలకంటే ఎక్కువ కరోనా పరీక్షలు నిర్వహించాం. ముఖ్యంగా ఫ్రాన్స్, బ్రిటన్, దక్షిణ కొరియా, జపాన్, సింగపూర్, భారత్, ఆస్ట్రేలియా, ఆస్ట్రియా, స్వీడన్, కెనడా దేశాలతో పోలిస్తే మేము చేసిన పరీక్షలు అధికం."
-డొనాల్డ్ ట్రంప్, అమెరికా అధ్యక్షుడు.
50 శాతం తగ్గిన కేసులు...
ఇప్పటివరకు అమెరికాలో 40 వేల మందికిపైగా కరోనాకు బలయ్యారు. సుమారు 7లక్షల 64వేల మందికి ఈ మహమ్మారి సోకింది. వైరస్ ప్రభావం తీవ్రంగా ఉన్న న్యూయార్క్లో 2లక్షల 42వేల కేసులు నమోదు కాగా.. 17 వేలకుపైగా మృత్యువాత పడ్డారు. అయితే గత ఎనిమిది రోజుల వ్యవధిలో కొత్త కేసుల సంఖ్య 50 శాతం తగ్గినట్లు ట్రంప్ పేర్కొన్నారు.
మీ రక్షణ మా బాధ్యత...
ఇటలీ, స్పెయిన్ దేశాలు మొదట లాక్డౌన్ ప్రకటించడంలో ఆలస్యం చేసినందు వల్ల.. ఇప్పుడు భారీ మూల్యం చెల్లించాల్సి వస్తోందన్నారు ట్రంప్. తమ దేశంలోనూ భౌతిక దూరం పాటించకపోయినట్లైతే లక్షలాది మంది చనిపోయేవారని పేర్కొన్నారు.
ప్రస్తుతం అమెరికాలో 95శాతం మంది ఇళ్లకే పరిమితమయ్యారు.
కరోనా వైరస్ పుట్టుకపై దర్యాప్తు
వైరస్కు కేంద్ర బిందువైన వుహాన్లో కరోనా వైరస్పై దర్యాప్తు చేపట్టేందుకు నిపుణుల బృందాన్ని చైనాకు పంపించే యోచనలో ఉన్నట్లు ట్రంప్ తెలిపారు. ఈ మహమ్మారిని ప్లేగు వ్యాధితో పోల్చిన ట్రంప్.. చైనాలో అసలేం జరుగుతుందో నిగ్గు తేల్చాలని అనుకుంటున్నట్లు వెల్లడించారు.
