మాదక ద్రవ్యాలు సరఫరా, అక్రమంగా రవాణా చేసే దేశాల జాబితాలో భారత్ను చేర్చారు అమెరికా అధ్యక్షుడు డొనాల్డ్ ట్రంప్. బహమాస్, అఫ్గానిస్థాన్, కొలంబియా, బర్మా, కోస్టా రికా, పెరూ ఇలాంటి 20 దేశాల్లో భారత్ కూడా ఉందని అన్నారు.
డ్రగ్స్ కార్యకలాపాలతో సంబంధమున్న నేరపూరిత సంస్థలను విడిచిపెట్టేది లేదని ట్రంప్ ఉద్ఘాటించారు. మాదక ద్రవ్యాల మహమ్మారి కట్టడిలో అమెరికా తన పోరాటం కొనసాగిస్తుందని స్పష్టం చేశారు.
అంతర్జాతీయ మాదక ద్రవ్యాల నిరోధక ఒప్పందాలకు అనుగుణంగా.. బొలీవియా, వెనిజువెలా తమ బాధ్యతలను నిర్వర్తించడంలో విఫలమయ్యాయని ఆరోపించారు ట్రంప్. డ్రగ్స్ నియంత్రణ కోసం ఈ దేశాలు చర్యలేవీ తీసుకోలేదని మండిపడ్డారు. వెనిజువెలా అధ్యక్షుడు నికోలస్ మదురోనే లక్ష్యంగా విమర్శలు గుప్పించారు ట్రంప్. ఆయనను ఓ నియంతగా పేర్కొన్నారు.
'కోకా సాగు పెరిగిపోతోంది'
దీర్ఘకాలంగా అమెరికా మిత్ర దేశాలైన కొలంబియా, పెరూను ఈ జాబితాలో చేర్చింది అగ్రరాజ్యం. పోలీసులు, సాయుధ దళాలు.. మాదక ద్రవ్యాల అక్రమ రవాణాను అడ్డుకుంటున్నప్పటికీ కొలంబియాలో కోకా(మత్తు పదార్థం) సాగుకు అడ్డుకట్ట పడటం లేదని ట్రంప్ అన్నారు.
పెరూలో కోకా సాగు, కొకైన్ ఉత్పత్తి రికార్డు స్థాయి గరిష్ఠానికి చేరిందని ఆందోళన వ్యక్తం చేశారు. ఈ దేశాల్లో డ్రగ్స్ నియంత్రణకు అమెరికా కట్టుబడి ఉందని ఉద్ఘాటించారు.
మెక్సికోకు హెచ్చరిక..
తమ భూభాగంలో విస్తృతంగా ఉత్పత్తి అవుతోన్న ఫెంటనైల్ వాడకాన్ని అరికట్టాల్సిన అవసరాన్ని మెక్సికో ప్రభుత్వం గుర్తుపెట్టుకోవాలని హెచ్చరించారు అమెరికా అధ్యక్షుడు. మాదక ద్రవ్యాల ముఠాలతో బెదిరింపులకు గురవుతోన్న అమెరికా, మెక్సికన్ల భద్రతను దృష్టిలో పెట్టుకొని ఆ దిశగా కృషి చేయాలని సూచించారు.
