గాల్వన్ లోయ ఘర్షణలో భారత సైనికులు మరణించడంపై అమెరికా విచారం వ్యక్తం చేసింది. సైనికుల మృతిపై భారత ప్రజలకు ఆ దేశ విదేశాంగ మంత్రి మైక్ పాంపియో ప్రగాఢ సానుభూతి ప్రకటించారు.
"చైనాతో జరిగిన ఘర్షణలో అమరులైన భారత సైనికులకు మా సంతాపం తెలియజేస్తున్నాం. సైనికుల కుటుంబాలు, సన్నిహితులు, సమాజానికి సానుభూతి వ్యక్తం చేస్తున్నాం."
- మైక్ పాంపియో
హవాయిలో చైనా కమ్యూనిస్టు పార్టీ ప్రతినిధి యాంగ్తో భేటీ అయిన పాంపియో.. ఘర్షణ అంశం చర్చకు వచ్చిందా లేదా అన్న విషయాన్ని వెల్లడించలేదు. అయితే భారత్- చైనా మధ్య ఉద్రిక్తతలను అమెరికా అధ్యక్షుడు నిశితంగా పరిశీలిస్తున్నట్లు శ్వేతసౌధం ఇప్పటికే ప్రకటించింది.
ఆక్రమణల కోసమే..
భూభాగాలను ఆక్రమించే ఉద్దేశంతోనే రెండు ఆసియా దిగ్గజాల మధ్య చైనా పీపుల్స్ లిబరేషన్ ఆర్మీ ఘర్షణలను ప్రేరేపించిందని అమెరికా కీలక సెనేటర్ మిచ్ మెక్కానెల్ స్పష్టం చేశారు. కీలకమైన విదేశీ విధాన ప్రసంగంలో ఈ వ్యాఖ్యలు చేశారు కానెల్.
"అమెరికాతో పాటు దాని మిత్ర పక్షాల ప్రయోజనాలకు ప్రమాదం కలిగించే దేశాల్లో చైనా మొదటిస్థానంలో ఉంది. రెండు అణ్వాయుధ దేశాల మధ్య జరిగిన హింసాత్మక ఘర్షణ ప్రపంచమంతా చూసింది. 1962 యుద్ధం తర్వాత అత్యంత హింసాత్మక ఘర్షణలను పీఎల్ఏ ప్రోత్సహించింది. రెండు దేశాల మధ్య మేం శాంతిని కోరుకుంటున్నాం."
- మెక్ కానెల్, సెనేటర్
కరోనా మహమ్మారితో ప్రపంచ దేశాలు ఇబ్బందులు ఎదుర్కొంటుంటే చైనా మాత్రం దురాక్రమణలకు అవకాశంగా వాడుకుంటోందని విమర్శించారు. తమ కోణంలో ప్రపంచ పటాన్ని మార్చేసే అంతలా ప్రయత్నాలు చేస్తోందని ఆరోపించారు.
"హాంకాంగ్లో జాతీయ భద్రతా చట్టాన్ని ప్రయోగించి ఆ భూభాగం మొత్తాన్ని తన నియంత్రణలోకి తీసుకుంది. సముద్రంలో జపాన్ సమీపంలోని సెన్కాకు దీవులకు సంబంధించి జపాన్ను బెదిరిస్తోంది. తైవాన్ గగనతలంలోకి నాలుగు సార్లు చొరబడి ఆ దేశమంతా తమదేనని వాదిస్తోంది."
- మెక్కానెల్, సెనేటర్
అమెరికాకు చెందిన మరో ఉన్నతాధికారి డేవిడ్ స్టిల్వెల్ కూడా ఇదే విషయాన్ని స్పష్టం చేశారు. అందరూ ఆపదలో ఉంటే.. చైనా మాత్రం పొరుగు దేశాలన్నింటితో కయ్యాలు పెట్టుకుంటోందని తెలిపారు. ఈ విపత్తును అవకాశంగా వాడుకుంటోందని ఆరోపించారు.
