ప్రత్యేక రకమైన ప్రోటీన్లను ఉత్పత్తి చేసే వ్యాక్సిన్.. కరోనా వైరస్పై సమర్థంగా పనిచేస్తోందని ఓ అధ్యయనం వెల్లడించింది. ఎలుకలపై జరిపిన ప్రయోగాల ఆధారంగా ఈ విషయాన్ని ధ్రువీకరించింది.
అమెరికాలోని ఒహాయో విశ్వవిద్యాలయానికి చెందిన శాస్త్రవేత్తలు ఈ పరిశోధనను చేపట్టారు. కణాల్లోకి చేరేందుకు వైరస్ వినియోగించే రెండు ప్రోటీన్లకు.. సహజసిద్ధమైన ప్రక్రియతో మార్పులు చేసి వాటి స్థాయిలను పెంచారు. అనంతరం వాటిని నానోపార్టికల్స్లోకి ప్యాక్ చేసి.. ఎలుకలకు ఇచ్చారు.
నెల రోజుల తర్వాత.. ఆ ఎలుకల్లో యాంటీబాడీలు అభివృద్ధి అయ్యాయి. మూడో దశ క్లినికల్ ట్రయల్స్లో ఉన్న టీకాలకు ఈ వ్యాక్సిన్ ప్రత్యామ్నాయమని ఒహాయో విశ్వవిద్యాలయానికి చెందిన అసిస్టెంట్ ప్రొఫెసర్ యిజౌ డాంగ్ చెప్పారు.
"ప్రస్తుతమున్న వ్యాక్సిన్లు పనిచేస్తే మంచిదే. ఒక వేళ అవి విఫలమైతే.. ఇది ప్రత్యామ్నాయం(ప్లాన్ బీ)గా ఉంటుంది. ఓ వ్యాక్సిన్ ఎలా పనిచేయాలని కోరుకుంటామో.. ఇది అలాగే చేసింది."
--- యిజౌ డాంగ్, ఒహాయో విశ్వవిద్యాలయ అసిస్టెంట్ ప్రొఫెసర్.
ఆర్ఎన్ఏలోని కొన్ని ప్రత్యేకమైన సీక్వెన్స్లను మార్చడం, జన్యు సమాచారాన్ని ప్రోటీన్లుగా మార్చగలిగే అణువులను మార్చడం ఇందులో భాగమని పరిశోధకులు వెల్లడించారు. ఈ సీక్వెన్సులు యూటీఆర్(అన్ట్రాన్స్లేటెడ్ రీజియన్స్) అని పేర్కొన్నారు. వీటిని ప్రోటీన్లుగా మార్చనప్పటికీ.. అధికంగా ప్రోటీన్లు పొందగలిగేలా వీటి నిర్మాణంలో మార్పులు చేసినట్టు వివరించారు.
ఇదీ చూడండి:- మూడో దశకు ఆస్ట్రాజెనెకా వ్యాక్సిన్ ట్రయల్స్
