కరోనా ధాటికి అగ్రరాజ్యం అమెరికా విలవిల్లాడుతోంది. కొద్ది రోజులుగా అక్కడ మృత్యువు విలయతాండవం చేస్తోంది. ఒక్క న్యూయార్క్ రాష్ట్రంలో గత 24 గంటల్లో 630 మంది బలయ్యారు. అంటే ప్రతి రెండున్నర నిమిషాలకు ఒకరు చనిపోయినట్లు లెక్క. రాష్ట్రంలో మొత్తం మృతుల సంఖ్య 3,500కు చేరింది.
అమెరికా మెత్తం మీద 3 లక్షలకుపైగా కేసులు నమోదు కాగా.. న్యూయార్క్లో 1,13,704 మందికి ఈ మహమ్మారి సోకింది. న్యూ జెర్సీ 30వేలతో అత్యధిక కేసులు నమోదైన రెండో రాష్ట్రంగా నిలిచింది.
న్యూయార్క్ రాష్ట్రంలో అవసరమైన వైద్య సామగ్రి అందుబాటులో లేకపోడవం వల్ల.. రోగులకు చికిత్స అందించడానికి వైద్యులకు కష్టంగా మారింది. వాటితో పాటు వ్యక్తిగత సంరక్షణ సామగ్రిలో భాగంగా మాస్కులు, గౌన్లు తదితర కిట్ల సదుపాయం తక్కువగా ఉందని రాష్ట్ర గవర్నర్ పేర్కొన్నారు.
అమెరికాలోని న్యూయార్క్ రాష్ట్రంలో పరిస్థితి చూస్తే నాకు ఆశ్చర్యంగా ఉంది. ఈ రకమైన పరికరాలను కూడా మనం తయారు చేసుకోలేం. వాటన్నింటినీ చైనా నుంచి తెప్పించుకోవడానికి ప్రయత్నిస్తున్నాం
-ఆండ్రియో క్యూమో, న్యూయార్క్ గవర్నర్
ప్రస్తుతం 17వేల వెంటిలేటర్లను ఆర్డర్ చేశామని.. అయితే పరిస్థితుల కారణంగా వీటి సరఫరా సరిపోదని పేర్కొన్నారు. మరోవైపు చైనా తమ వంతు సాయంగా 1,000 వెంటిలేటర్ల సదుపాయాన్ని కల్పించనున్నట్లు వివరించారు.
ఒక మిలియన్ దాటిన కేసులు
ఇప్పటివరకు ప్రపంచవ్యాప్తంగా కరోనా బారిన పడ్డవారి సంఖ్య 11,30,204కు చేరింది. సుమారు 190 దేశాల్లో ముత్తం 60,457 మంది ప్రాణాలు కోల్పోయారు. ఇటలీలో అత్యధికంగా 15,362 మంది మృతి చెందగా.. స్పెయిన్లో 11,744, అమెరికాలో 7,560, ఫ్రాన్స్లో 6,507, బ్రిటన్లో 4,313 మంది మహమ్మారికి బలయ్యారు.
కరోనా వ్యాప్తిని అరికట్టే క్రమంలో దేశంలో లాక్డౌన్ను ఏప్రిల్ 25వరకు పొడిగించినట్లు స్పెయిన్ ప్రధాని పెడ్రో శాంచెజ్ శనివారం ప్రకటించారు.
భవిష్యత్తులో మరింత తీవ్రం...
బ్రిటన్లో తాజాగా 708 మంది మరణించగా.. ఇప్పటివరకు వైరస్ ధాటికి 4,313 మంది మృతి చెందారు. ఈ వారంలో రోజుకు 500 మంది చొప్పున వైరస్కు బలయ్యారు. రానున్న 10 రోజుల్లో పరిస్థితి మరింత తీవ్రం కానుందని అధికారులు తెలిపారు.
ఇక్కడా పరిస్థితి అంతే..
ఫ్రాన్స్లోనూ వైరస్ విజృంభిస్తోంది. గడిచిన 24 గంటల్లో మరో 441 మంది మహమ్మారికి బలయ్యారు. దేశంలో మొత్తం 7,560 మంది ప్రాణాలు కోల్పోయారు.
ఆయా దేశాల్లో పరిస్థితి ఇలా..
- మాల్దీవుల్లో ఓ హోటల్ సిబ్బందిలో ఇద్దరికి కరోనా పాజిటిల్ తేలడం వల్ల.. తొలి కేసు నమోదైంది.
- చైనాలో మహమ్మారి బారిన పడి మరణించిన వారికి జాతీయ సంతాపం తెలిపారు.
- కరోనా కారణంగా ప్రపంచ ఆర్థిక వ్యవస్థపై 4.1 ట్రిలియన్ డాలర్ల భారం పడింది. అమెరికాలో నిరుద్యోగ రేటు 4.4 శాతానికి పెరిగినట్లు నివేదకలు వెల్లడించాయి.
- వైరస్ కారణంగా వందల మిలియన్ల మందికి ఆహార కొరత ఏర్పడుతోంది. ముఖ్యంగా ఆఫ్రికాలో ఈ ప్రభావం తీవ్రంగా కనిపిస్తోంది.
