ప్రపంచాన్ని గడగడలాడిస్తున్న కరోనా వైరస్.. చైనా వుహాన్ ల్యాబ్ నుంచి తప్పించుకుందా? లక్షకుపైగా మరణాలకు కారణమైన వైరస్ పుట్టుకపై చైనా అబద్ధాలు చెబుతోంది? ఇలాంటి ప్రశ్నలకు సమాధానం వెతికేందుకు అమెరికా దర్యాప్తు చేపట్టింది. తాజాగా.. వుహాన్లోని వైరాలజీ ల్యాబ్ నుంచే ప్రపంచ మహమ్మారి తప్పించుకుందన్న నివేదికలను అగ్రరాజ్యం పరిశీలిస్తున్నట్టు అధ్యక్షుడు డొనాల్డ్ ట్రంప్ వెల్లడించారు.
"ఈ విషయాన్ని మేము పరిశీలిస్తున్నాము. వీటన్నిటినీ కలిపి చూస్తుంటే ఏదో జరిగిందనే భావం ఏర్పడుతోంది. ఒక రకమైన గబ్బిలం గురించి చైనా మాట్లాడుతోంది. అయితే ఆ గబ్బిలం ఆ ప్రాంతంలోనే లేదు. అది 40 మైళ్ల దూరంలో ఉంది. వుహాన్ మార్కెట్లలో ఆ రకమైన గబ్బిలాన్ని అసలు అమ్మనే లేదు."
--- డొనాల్డ్ ట్రంప్, అమెరికా అధ్యక్షుడు.
వైరస్ పుట్టుక చుట్టూ అనేక వింత పరిణామాలు చోటుచేసుకుంటున్నాయని.. నిజాన్ని కచ్చితంగా బయటపెడతామని అమెరికా అధ్యక్షుడు ధీమా వ్యక్తం చేశారు. ఈ నేపథ్యంలో వుహాన్ వైరాలజీ ల్యాబ్కు.. మాజీ అధ్యక్షుడు ఒబామా తన హయాంలో 3.7 మిలియన్ డాలర్ల నిధులు మంజూరు చేయడాన్ని గుర్తుచేశారు. త్వరలోనే ల్యాబ్కు ఆర్థిక సాయం నిలిపివేస్తామని స్పష్టంచేశారు.
ఈ పూర్తి వ్యవహారంపై వుహాన్ ల్యాబ్కు సంబంధించిన వివరాలను అమెరికా నిఘా అధికారులు సేకరిస్తున్నట్టు ఆ దేశ మీడియా కథనం ప్రచురిచింది. తమ వద్ద ఉన్న సమాచారంతో అసలు ఏం జరిగిందని తెలుసుకోవడానికి అధికారులు ప్రయత్నిస్తున్నట్టు పేర్కొంది.
ఇదీ చూడండి:- ట్రంపరితనానికి కళ్లెం వేసిన కరోనా!
