బలమైన గాలులతో ఈటా తుపాను క్యూబా, దక్షిణ ఫ్లోరిడాపై విరుచుకుపడటానికి సిద్ధంగా ఉంది. అంతకుముందు మధ్య అమెరికా, మెక్సికోలో ఈ హరికేన్ ధాటికి పదుల సంఖ్యలో మరణించారు. 100 మందికిపైగా గల్లంతయ్యారు. తుపాను కారణంగా గ్వాటెమాలాలో కురిసిన భారీ వర్షానికి కొండచరియల విరిగిపడటం వల్ల చాలా మంది మట్టిగడ్డల కింద కూరుకుపోయారు.
ఈ ప్రమాదంలో ఇప్పటికే 15 మంది మృతి చెందగా.. 109 మంది గల్లంతయినట్లు అధికారులు వెల్లడించారు. వారిలో ఎక్కువ మంది విరిగిన కొండచరియల కిందే చిక్కుకుపోయినట్లు తెలిపారు. వారికోసం గాలింపు చర్యలు కొనసాగిస్తున్నారు. దాదాపు 150 ఇళ్లు ధ్వంసమైనట్లు అంచనా వేస్తున్నారు.
ఈ రాష్ట్రాలకు ముప్పు..
దక్షిణ ఫ్లోరిడా, ఫ్లోరిడా కీస్లకు 'అమెరికా జాతీయ తుపాను హెచ్చరికల కేంద్రం' ఇప్పటికే హెచ్చరికలు జారీ చేసింది. సెంట్రల్ క్యూబా, దక్షిణ ఫ్లోరిడా, కీస్లలోని కొన్ని ప్రాంతాల్లో తుపాను ప్రభావాన్ని నిశితంగా పరిశీలిస్తోంది.
ఈటా.. ఆదివారం ఉదయానికి క్యూబాలోని క్వామగ్వేకు పశ్చిమంగా 145 కిలోమీటర్ల దూరంలో కేంద్రీకృతమైందని హెచ్చరికల కేంద్రం తెలిపింది. ఈ ప్రాంతానికి ఈశాన్య దిశగా గంటకు 100 కిలోమీటర్లు వేగంతో వీస్తున్న గాలులతో.. గంటకు 19 కిలోమీటర్ల వేగంతో ఈటా కదులుతోందని వెల్లడించింది.
ఫ్లోరిడాలో రెడ్ అలర్ట్..
ఫ్లోరిడా కీస్, దక్షిణ ఫ్లోరిడాను ఆదివారం సాయంత్రం లేదా సోమవారం నాటికి తుపాను తాకనుంది. ఈ నేపథ్యంలో ఫ్లోరిడా గవర్నర్ రాన్ డిశాంటిస్.. శనివారం ఎనిమిది కౌంటీల్లో అత్యయిక స్థితిని ప్రకటించారు. నిత్యవసర వస్తువులను నిల్వ ఉంచుకోవాలని స్థానికులకు సూచించారు.
కరోనా పరీక్ష కేంద్రాలు, నౌకాశ్రయాలు, బీచ్లు మూసేశారు. ఓడరేవుల సమీపంలోని, లోతట్టు ప్రాంతాల్లో నివసిస్తున్న ప్రజలను సురక్షిత ప్రదేశాలకు తరలిస్తున్నారు. కీస్ ప్రాంతంలో తుపాను కదలికలను ప్రభుత్వ యంత్రాంగం నిశితంగా పరిశీలిస్తోంది.
ఇదీ చూడండి: జూన్ నుంచి చైనాలోనే భారత నౌక.. సిబ్బంది ఆవేదన
