కరోనా మహమ్మారి యావత్ ప్రంపంచాన్ని గడగడలాడిస్తోంది. లక్షలాది మంది వైరస్ బారిన పడి ప్రాణాలు కోల్పోతున్నారు. ఈ తరుణంలో కోరనాకు సంబంధించి కీలక విషయాన్ని వెల్లడించారు అమెరికా ఆరోగ్య నిపుణులు. ఒక్కసారి వైరస్ బారిన పడిన వారికి మళ్లీ వ్యాధి సోకే అవకాశాలు చాలా తక్కువని చెబుతున్నారు.
కరోనా నుంచి కోలుకున్న వారికి కొన్ని వారాల తర్వాత మళ్లీ పాజిటివ్గా తేలుతున్నట్లు పలు నివేదికలు వెల్లడించాయి. రెండోసారి వ్యాధి బారినపడ్డట్లు బాధితులు భావిస్తున్నారు. అయితే పరీక్షల పొరపాట్ల వల్ల కూడా కరోనా నుంచి కోలుకున్న వారికి పాజిటివ్ వచ్చి ఉండవచ్చని తెలిపారు బోస్టన్ కాలేజ్లో గ్లోబల్ పబ్లిక్ హెల్త్ ప్రోగ్రామ్ డైరెక్టర్ డా. ఫిలిప్ లాండ్రిగన్. రెండోసారి పాజిటివ్ వచ్చిన వారి ద్వారా వైరస్ వ్యాప్తి చెందదన్నారు.
కరోనా సోకిన వారిలో యాంటీబాడీలు ఉత్పత్తి అవుతాయని, అవి వైరస్పై పోరాడి నశింపజేస్తాయని ఇటీవల ప్రచురితమైన అమెరికా అధ్యయనం తెలిపింది. అయితే ఈ యాంటీబాడీలు శరీరంలో దీర్ఘకాలం ఉండలేవని పేర్కొంది. యాండీబాడీలు మాత్రమే కాకుండా రోగ నిరోధక వ్యవస్థ కూడా వైరస్పై పోరాడగలదని పరిశోధన స్పష్టం చేసింది. కరోనా బారినపడ్డవారిలో ఈ రెండు మరోసారి వైరస్ బారిన పడకుండా రక్షిస్తాయని వివరించింది.
కరోనా బాధితులు మళ్లీ వైరస్ బారిన పడే అవకాశాలుంటే అది ఇమ్యునిటీ పాస్పోర్టులను బలహీన పరిచినట్లేనని లాండ్రిగన్ చెప్పారు. అలాంటప్పుడు దీర్ఘకాలిక రక్షణ కోసం టీకాపైనే ఆశలు పెట్టుకోవాలన్నారు.
