టాలీవుడ్ అంతటా ఇప్పుడు రీరిలీజ్ల ట్రెండ్ నడుస్తోంది. ఇప్పటికే అభిమానుల కోరిక మేరకు పలువురు స్టార్ హీరోల సినిమాలు.. వారి పుట్టినరోజు సందర్భంగా విడుదలవుతూ థియేటర్లలో సందడి చేస్తున్నాయి. మహేశ్ బాబు 'పోకిరి'తో స్టార్ట్ అయిన ఈ ట్రెండ్ సక్సెస్ఫుల్గా కొనసాగుతోంది. ఆ తర్వాత వచ్చిన 'ఒక్కడు', 'ఖుషి', 'జల్సా' సినిమాలకు సైతం సిల్వర్స్క్రీన్పై మంచి రెస్పాన్స్ వచ్చింది. అయితే ఇప్పుడు మరిన్ని సినిమాలు త్వరలో రిలీజయ్యేందుకు సిద్ధంగా ఉన్నాయి.
కానీ ఈ నెలలో రీరిలీజ్ల సినిమాల విషయంలో ఓ స్పెషల్ ఉంది. అదేంటంటే.. ఈ నెల మొత్తం మెగా హీరోల ట్రెండ్ నడిచేలా ఉంది. మార్చి 4న మెగాస్టార్ చిరంజీవి 'గ్యాంగ్ లీడర్' రిలీజయ్యేందుకు సిద్ధమైన విషయం తెలిసిందే. ఈ 'గ్యాంగ్ లీడర్' 32 ఏళ్ల క్రితం సినిమా కావడం వల్ల దీన్ని 4కేకు మార్చడానికి మేకర్స్కు బాగా ఖర్చు అయ్యినట్లు సమాచారం. అంతే కాకుండా ఇదే నెలలో మెగా పవర్ స్టార్ రామ్ చరణ్ సినిమా కూడా రిలీజయ్యేందకు రెడీగా ఉంది. దర్శక ధీరుడు రాజమౌళి తెరకెక్కించిన బ్లాక్ బస్టర్ మూవీ 'మగధీర' కూడా చరణ్ బర్త్డే (మార్చి 27) సందర్భంగా రిలీజయ్యేందుకు సిద్ధంగా ఉంది.
అలా తండ్రీ కొడుకుల హవా నడిచే వేళ మెగా ఇంటి బంధువైన అల్లు కుటుబం కూడా.. తమ వారసుడి సినిమాను రీ రిలీజ్ చేసేందుకు సన్నాహాలు చేస్తోంది. పూరి జగన్నాథ్ దర్శకత్వంలో తెరకెక్కిన మాస్ కమర్షియల్ ఎంటర్టైనర్ 'దేశముదురు' కూడా మార్చిలో రీరిలీజయ్యేందుకు సిద్ధం అవుతున్నట్లు తెలుస్తోంది. అయితే ఒక వేళ మార్చిలో రిలీజవ్వకపోతే ఈ సినిమాను ఏప్రిల్ 8 బన్నీ బర్త్డే సందర్భంగా ప్రేక్షకుల ముందుకు తీసుకొస్తారట. కానీ ఫ్యాన్స్ మాత్రం మార్చిలోనే ఈ చిత్రాన్ని రీరిలీజ్ చేస్తే బాగుండు అని అభిప్రాయపడుతున్నారు. మార్చి నెలలో మెగాహీరోల సందడి అంటూ ట్రెండ్ చేస్తున్నారు.
ఇంత మంది వచ్చాక ఇక పవర్ స్టార్ రాకపోతే ఈ ట్రెండ్కు కిక్ ఏం ఉంటుంది. అందుకే పవన్ కల్యాణ్ 'గబ్బర్ సింగ్' సినిమా కూడా ఈ నెలలోనే రిలీజ్ కానుందట. దీనికి సంబంధించి నిర్మాత బండ్ల గణేశ్ సన్నాహాలు చేస్తున్నట్లు సమాచారం. అన్నీ అనుకున్నట్లు జరిగితే ఈ మూవీ కూడా మార్చి 24న థియేటర్లో సందడి చేయనుంది. అలా మొత్తానికి ఈ మార్చి నెలంతా థియేటర్లలో మెగా హీరోలు సండడి చేయనున్నారనమాట.
