Vijaydevarkonda Samantha movie starts: 'లైగర్‌' బాయ్‌ విజయ్ దేవరకొండ కెరీర్‌లో స్పీడ్‌ పెంచారు. 'లైగర్‌' విడుదల కాకముందే.. పూరీతోనే మరో చిత్రం 'జనగణమన'ను పట్టాలెక్కించారు. ఇప్పుడు తాజాగా ఇంకో కొత్త ప్రాజెక్ట్‌ను ఓకే చేసి సెట్స్పైకి తీసుకెళ్లారు. 'మజిలీ', 'నిన్నుకోరి' వంటి సున్నితమైన ప్రేమకథలతో ప్రేక్షకులకు చేరువైన శివ నిర్వాణతో కలిసి సినిమా చేస్తున్నారు. గురువారం ఉదయం ఈ మూవీ పూజా కార్యక్రమం హైదరాబాద్‌లో జరిగింది. దర్శకుడు హరీశ్ శంకర్ ముఖ్య అతిథిగా పాల్గొని చిత్రబృందానికి అభినందనలు తెలిపారు.
విజయ్ దేవరకొండ 11వ ప్రాజెక్ట్‌గా సిద్ధమైన ఈ చిత్రంలో సమంత హీరోయిన్గా కనిపించనున్నారు. ఇప్పటికే వీరిద్దరూ 'మహానటి'లో కలిసి నటించి మెప్పించారు. మనసుని హత్తుకునే ప్రేమకథతో ఫ్యామిలీ ఎంటర్‌టైనర్‌గా ఈ కొత్త సినిమా రూపుదిద్దుకోనుందని, దీనికి 'ఖుషి' టైటిల్ పెట్టే అవకాశం ఉందని జోరుగా ప్రచారం సాగుతోంది. మైత్రి మూవీ మేకర్స్‌ పతాకంపై ఈ సినిమా నిర్మిస్తున్నారు.
యూరప్‌ నుంచి వచ్చేసిన విజయ్..!
'లైగర్‌' ప్రమోషన్స్‌, 'జనగణమన' షూట్‌, శివ నిర్వాణ ప్రాజెక్ట్‌.. ఇలా వరుస లైనప్స్‌ ఉండటం వల్ల వర్క్‌లైఫ్‌ నుంచి విజయ్ కాస్త బ్రేక్‌ తీసుకున్నారు. పర్సనల్‌ లైఫ్‌ను ఎంజాయ్‌ చేయాలనే ఉద్దేశంతో ఫ్యామిలీతో కలిసి ఆయన గతవారం యూరప్‌ టూర్‌కు వెళ్లారు. టూర్‌కు సంబంధించిన అప్‌డేట్‌లను సైతం ఆయన తరచూ సోషల్‌మీడియాలో షేర్‌ చేశారు. ఈ క్రమంలోనే వెకేషన్‌ పూర్తి చేసుకొని బుధవారం హైదరాబాద్‌లో ల్యాండ్‌ అయ్యారు.
ఇదీ చూడండి: త్రివిక్రమ్కు మహేశ్ డెడ్లైన్.. రాజమౌళి కోసమే!
