టాలీవుడ్ స్టార్ హీరో పవన్ కల్యాణ్ వరుస సినిమాలతో బిజీగా ఉన్నారు. ఇప్పటికే రెండు సినిమాలు పట్టాలెక్కించగా.. మరో రెండు సిద్ధం చేశారు. ఇటీవలే ఐదో సినిమాకు కూడా గ్రీన్ సిగ్నల్ ఇచ్చారని తెలుస్తోంది. అయితే సముద్ర ఖని దర్శకత్వంలో రూపొందుతున్న వినోదయ సీతం రీమేక్.. నెల రోజుల క్రితమే ప్రారంభమైంది. ఈ సినిమాను నాలుగు నెలల్లోనే పూర్తి చేస్తామని.. జులైలో రిలీజ్ చేయబోతున్నట్లు మేకర్స్ ప్రకటించారు. కానీ క్రిష్ దర్శకత్వంలో రెండున్నరేళ్ల క్రితం ప్రారంభమైన హరిహర వీరమల్లు.. రిలీజ్ డేట్పై ఇంకా క్లారిటీ రాలేదు. దీంతో పవన్ ఫ్యాన్స్ ఆందోళన చెందుతున్నారు.
2020లో స్టార్ట్..
2020 సంవత్సరం సెప్టెంబరు నెలలో దర్శకుడు క్రిష్.. హరిహర వీరమల్లు షూటింగ్ను మొదలుపెట్టారు. కానీ 30 నెలలుగా ఈ సినిమా షూటింగ్ సాగుతూనే ఉంది. హరిహర వీర‌మ‌ల్లుతో పాటు షూటింగ్ మొద‌లుపెట్టిన పలువురు టాలీవుడ్ స్టార్ హీరోలు.. ఈ గ్యాప్‌లో రెండు సినిమాల్ని పూర్తిచేశారట. కానీ పవన్ మూవీ మాత్రం 50 శాతం షూటింగ్ కూడా పూర్తికాలేద‌ట.
విడుదల తేదీలు ఎన్ని ప్రకటిస్తారో?
మొదట.. ఏడాదిలోగే ఈ సినిమా షూటింగ్ పూర్తి చేస్తి.. 2021 సెప్టెంబరు నెలలో హరిహర వీరమల్లు విడుదల చేయాలని మేకర్స్ అనుకున్నారు. ఆ తర్వాత నాలుగు విడుదల తేదీలు ప్రకటించారు. కానీ సినిమా రిలీజ్ కాలేదు. చిత్రయూనిట్ చెప్పిన మాట నిలబెట్టుకోలేకపోయారని ఫ్యాన్స్.. నెట్టింట కామెంట్లు పెడుతున్నారు. ఈ సారి అనౌన్స్ చేసే ఐదో రిలీజ్ డేట్‌కు అయినా సినిమాను రిలీజ్ చేస్తారో లేదో అని అభిమానులు ఎదురుచూస్తున్నారు. అయితే తాజా వార్తల ప్రకారం.. ఈ చిత్రాన్ని ద‌స‌రాకు రిలీజ్ చేసే అవ‌కాశం ఉన్న‌ట్లు ప్రచారం జరుగుతోంది. అప్ప‌టిలోగా షూటింగ్ పూర్తి చేసుకొని సినిమాను రిలీజ్ చేస్తారా? లేదా? అన్న‌ది అనుమానంగానే ఉందని ఫ్యాన్స్ అంటున్నారు.
ప్రస్తుతం పవన్ కల్యాణ్.. సముద్ర ఖని సినిమాతో బిజీగా ఉన్నారు. ఆ తర్వాత సుజీత్, హారీశ్ శంకర్ సినిమాలు చేయనున్నారు. ఈ మూడు చిత్రాలకు సంబంధించి వార్తలు వస్తున్నా.. హరిహర వీరమల్లుకు సంబంధించి ఎలాంటి కొత్త అప్డేట్ రావడం లేదు. అసలు ఈ సినిమా షూటింగ్ జ‌రుగుతోందా లేదా అన్న‌ది కూడా డౌటే! ఈ సినిమాకు పవన్ డేట్స్ క‌రెక్ట్‌గానే ఇచ్చినా స‌కాలంలో షెడ్యూల్స్ పూర్తిచేయ‌డంలో క్రిష్ విఫ‌ల‌మైన‌ట్లుగా సినీ వర్గాల్లో ప్రచారం జరుగుతోంది.
మొఘ‌లుల కాలం నాటి క‌థాంశంతో క్రిష్ తెర‌కెక్కిస్తున్న ఈ చిత్రంలో.. హీరో పవన్ బందిపోటు దొంగ పాత్ర‌లో న‌టిస్తున్నారట. బీటౌన్ స్టార్ హీరో బాబీ డియోల్.. మొఘ‌లుల రాజు ఔరంగ‌జేబు పాత్ర‌లో క‌నిపించ‌బోతున్నారు. పవన్ సరసన క్యూట్ భామ నిధి అగ‌ర్వాల్ హీరోయిన్‌గా న‌టిస్తున్నారు.
