ప్రకాశం జిల్లా: ఒంగోలులోని కీర్తి మెడికల్‌ స్టోర్‌లో షార్ట్‌సర్క్యూట్‌తో అగ్నిప్రమాదం సంభవించింది. ఈ ప్రమాదంలో మందులు, సామగ్రి పూర్తిగా కాలిపోయాయి.
*త్రిపురాంతకం మండలం డీవీఎన్‌ కాలనీ సమీపంలో గుర్తుతెలియని వాహనం ఢీకొని ఇద్దరు మృతి చెందారు. మృతులను యర్రగొండపాలెం మండలానికి చెందిన వెంకటేశ్వర్లు, పోతులూరిగా గుర్తించారు.
నెల్లూరు జిల్లా: ఆత్మకూరు మండలం కరటంపాడు ఈద్గా వద్ద ప్రార్థనలు చేసుకుంటున్న ముస్లింలపై తేనెటీగల దాడి చేశాయి. ఈ దాడిలో పలువురికి గాయాలయ్యాయి.
*జిల్లాలోని భగత్ సింగ్ కాలనీ వద్ద ఓ వ్యక్తి హత్యకు గురైయ్యాడు. సమాచారం అందుకున్న పోలీసులు ఘటనపై విచారణ చేపట్టారు.
కోనసీమ జిల్లా: ఆత్రేయపురం మండలం పిచ్చుకలంక బ్యారేజ్‌ దిగువన స్నానాలు చేస్తూ ఇద్దరు మహిళలు గల్లంతయ్యారు. వారిలో ఒక మహిళ మృతదేహాన్ని పోలీసులు బయటకు తీశారు. ఇంకొకరి కోసం పోలీసులు గాలిస్తున్నారు. గల్లంతైన ఇద్దరు మహిళలని రాజమహేంద్రవరం వాసులుగా గుర్తించారు.
శ్రీకాకుళం జిల్లా: ఎచ్చెర్ల గురుకుల పాఠశాల వసతిగృహంలో ఫ్యాన్‌కు ఉరేసుకొని కరిష్మా అనే విద్యార్థిని ఆత్మహత్య చేసుకుంది.
శ్రీ సత్య సాయి జిల్లా: కర్ణాటక నుంచి కారులో అక్రమంగా తరలిస్తున్న మద్యాన్ని శ్రీ సత్య సాయి జిల్లా తనకల్లు పోలీసులు స్వాధీనం చేసుకున్నారు. మొత్తం 1824 మద్యం ప్యాకెట్లను గుర్తించారు. మద్యంతో పాటు కారును స్వాధీనం చేసుకున్న పోలీసులు ముగ్గురిని అరెస్టు చేశారు.
*శ్రీ సత్య సాయి జిల్లా బత్తలపల్లి మండలం మాల్యవంతం గ్రామ సమీపంలోని మలుపు వద్ద ఆర్టీసీ బస్సు లారీని ఢీకొట్టింది. ఈ ప్రమాదంలో ఐదుగురికి గాయాలయ్యాయి. ఈ ఘటనపై బత్తలపల్లి పోలీసులు కేసు నమోదు చేసుకొని విచారణ చేస్తున్నారు.
వైఎస్సార్ జిల్లా: వేంపల్లె పట్టణంలో విద్యుత్ షాక్కు గురై జూనియర్ లైన్మెన్ మిథున్ చక్రవర్తి మృతి చెందాడు. కాపువీధిలో విద్యుత్ ట్రాన్స్ఫార్మర్కు ఫీజులు వేస్తుండగా ఈ ప్రమాదం సంభవించింది. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.
ఏలూరు జిల్లా: కైకలూరు మండలం గుమ్మళ్లపాడు గ్రామంలో నాటు సారా తయారీ కేంద్రాలపై దాడులు నిర్వహించారు. ఈ దాడుల్లో మూడు వందల లీటర్ల నాటుసారాను స్వాధీనం చేసుకొని, ఇద్దరు వ్యక్తులను అరెస్టు చేసినట్లు అడిషనల్ ఎస్పీ చక్రవర్తి తెలిపారు.
కృష్ణా జిల్లా: బైక్‌ల దొంగను హనుమాన్ జంక్షన్ పోలీసులు పట్టుకున్నారు. అతడి నుంచి రూ.19 లక్షల విలువచేసే 14 బైక్‌లు స్వాధీనం చేసుకున్నారు.
చిత్తూరు జిల్లా: బైరెడ్డిపల్లి మండలం ఎం.కొత్తూరులో విషాదం చోటుచేసుకుంది. పొలం పనులకు వెళ్లిన ఇద్దరు మహిళలు పిడుగుపాటుకు గురై మృతిచెందారు.
పల్నాడు జిల్లా: మద్యం మత్తులో ఉన్న నాగరాజు అనే వ్యక్తి నిద్రిస్తున్న బాలికపై అత్యాచారయత్నం చేశాడు. బాలిక కేకలు విన్న స్థానికులు అతడిని పట్టుకుని దేహశుద్ధి చేసి, పోలీసులకు అప్పగించారు. బాధితురాలి కుటుంబసభ్యుల ఫిర్యాదు మేరకు పోలీసులు కేసు నమోదు చేశారు.
ఎన్టీఆర్ జిల్లా: చందర్లపాడు మండలం ముప్పాళ్లలో అగ్నిప్రమాదం సంభవించింది. ప్రమాదవశాత్తు నిప్పంటుకుని 10 ఎకరాల సుబాబుల్ తోట దగ్ధమైంది.
కోనసీమ జిల్లా: తాజాగా.. కోనసీమ జిల్లాలో 13 ఏళ్ల బాలికపై లైంగిక దాడి జరిగింది. ఆర్‌ఎంపీ వైద్యుడు వేగి రమేశ్‌.. అత్యాచారం చేశాడని పోలీసులకు బాధిత బాలిక తల్లిదండ్రులు ఫిర్యాదు చేశారు. దీంతో ఆర్ఎంపీపై పోక్సో చట్టం కింద కేసు నమోదు చేసి దర్యాప్తు చేపట్టినట్లు పోలీసులు తెలిపారు.
ఇదీ చదవండి: విజయనగరంలో మహిళపై అత్యాచారం... పోలీసుల అదుపులో నిందితుడు
