Atchannaidu on CM Jagan: జగన్ రెడ్డి పాలనలో ఆక్వా రంగం సంక్షోభంలో కూరుకుపోయిందని తెదేపా రాష్ట్ర అధ్యక్షుడు అచ్చెన్నాయుడు ఆరోపించారు. అత్యధిక ఆదాయం, ఉపాధి కల్పించే ఆక్వారంగంపై జగన్ ప్రభుత్వం కక్షసాధింపు చర్యలకు దిగుతోందని అచ్చెన్నాయుడు మండిపడ్డారు. ఆక్వా విద్యుత్ రాయితీలను తక్షణమే పునరుద్ధరించి ఛార్జీల భారాన్ని తగ్గించాలని ప్రభుత్వాన్ని ఆయన డిమాండ్ చేశారు. తెలుగుదేశం హయాంలో తగ్గించిన ఆక్వా విద్యుత్ ఛార్జీలను ఇప్పుడు రెట్టింపు చేశారని మండిపడ్డారు. ఇప్పటికే విద్యుత్ కోతలు, పవర్ హాలిడే నిర్ణయాలతో ప్రాసెసింగ్ కంపెనీలు రొయ్యల ధరలు తగ్గించాయని ఆక్షేపించారు. జగన్ రెడ్డి రాయితీలు ఎత్తేస్తూ తీసుకున్న అసమర్థ నిర్ణయంతో ఆక్వా రైతులు అప్పుల్లో కూరుకుపోయే ప్రమాదం ఉందన్నారు. ఆక్వా రైతులకు మేలు చేయకపోగా.. వారిపై ఛార్జీల భారం మోపారని మండిపడ్డారు. విద్యుత్ ఛార్జీల పెంచి ఆక్వారంగాన్ని పట్టపగలు ఉరితీశారని దుయ్యబట్టారు.
Kollu Ravindra on YSRCP: జగన్ ప్రభుత్వం బీసీలకు తీరని అన్యాయం చేస్తోందని తెదేపా నేత, మాజీ మంత్రి కొల్లు రవీంద్ర ఆరోపించారు. తితిదే, ఏపీఐఐసీ లాంటి నామినేటెడ్ పోస్టులను తెదేపా హయాంలో బీసీలకు ఇచ్చినట్లు ఆయన గుర్తుచేశారు. కార్పొరేషన్లు ఉన్నా.. వాటికి నిధులు లేవని, మంత్రిపదవులు ఉన్నా.. వారికి ఎలాంటి అధికారాలు లేవని ఆవేదన వ్యక్తం చేశారు. ఈ మేరకు కర్నూలులో మీడియాతో మాట్లాడారు. మత్స్యకారుల ఉనికికే ప్రమాదంగా మారిన జీవో నంబర్ 217ను రద్దు చేయాలని డిమాండ్తో ఈనెల 18న కర్నూలులో దీక్ష చేపట్టనున్నట్లు ఆయన తెలిపారు. మత్స్యకారుల కోసం విడతల వారీగా ఉద్యమాన్ని ఉద్ధృతం చేస్తామని స్పష్టం చేశారు.
TDP Beeda Ravichandra: ప్రతిపక్షాన్ని తిట్టేందుకే మంత్రులు కానీ.. ప్రజల కోసం పనిచేయడానికి కాదన్నది జగన్ క్యాబినెట్ను చూస్తే అర్థమవుతోందని తెదేపా జాతీయ ప్రధాన కార్యదర్శి బీదా రవిచంద్ర యాదవ్ అన్నారు. జగన్ మంత్రివర్గంలో చోటు దక్కాలంటే అవినీతి, మాఫియా, భూకబ్జాలే అర్హతలని పేర్కొన్నారు. ప్రజా సమస్యలపై సీఎం స్పందిస్తున్న తీరు ఆయన బలహీనతను బయటపెడుతోందన్నారు. 11మందిని పాతవారిని తిరిగి కెబినేట్లోకి తీసుకున్నారని.. మంత్రివర్గ విస్తరణ షాడో పరిపాలనను తలపిస్తోందని బీదా రవిచంద్రయాదవ్‌ దుయ్యబట్టారు.
Protest At Kamalapuram MPDO Office: ఉపాధి హామీ పనులు కల్పించాలంటూ వైఎస్ఆర్ జిల్లా కమలాపురం ఎంపీడీవో కార్యాలయం వద్ద తెదేపా నేతలతో కలిసి స్థానికులు నిరసన చేపట్టారు. కమలాపురంను ఇటీవలే నగర పంచాయతీగా ఏర్పాటు చేశారు. అయితే ప్రస్తుతం అక్కడ ఉపాధి హామీ పనులు లేకపోవడంతో స్థానికులు ఇబ్బంది పడుతున్నారు. ఈ క్రమంలో తెలుగుదేశం నాయకులతో కలిసి ఎంపీడీవో ఆఫీస్ వద్ద నిరసనకు దిగారు. ప్రస్తుత పరిస్థితుల్లో ఉపాధి పనులు లేకుంటే మేము జీవనం ఎలా సాగించాలని వారు ఆందోళన వ్యక్తం చేస్తున్నారు. సమస్యంపై అధికారులు స్పందించి మాకు ఉపాధి పనులు కలిగేలా చూడాలని కోరారు. ఈ మేరకు స్థానిక ఎంపీడీవో సిబ్బందికి వినతిపత్రం అందించారు. 'అయ్యా ఎమ్మెల్యే రవీంద్రనాథ్ రెడ్డి గారు.. మీ మేనల్లుడు ముఖ్యమంత్రిగా ఉన్నారు. దయ ఉంచి స్థానికులకు ఉపాధి పనులు కల్పించండి' అని తేదేపా జిల్లా మైనారిటీ అధ్యక్షులు ఖాదర్ భాష వేడుకున్నారు.
ఇదీ చదవండి:
