రాష్ట్రంలో హిందూ దేవాలయాలపై జరుగుతున్న వరుస దాడులపై సీబీఐ విచారణ జరిపించాలని తెదేపా నేతలు డిమాండ్‌ చేశారు. మత స్వేచ్ఛను కాలరాస్తూ ప్రాథమిక హక్కుల ఉల్లంఘనకు పాల్పడుతున్నారని ఆరోపించారు. గురువారం ఆ పార్టీ నేతలు ధూళిపాళ్ల నరేంద్ర, వర్ల రామయ్య, బుద్ధా వెంకన్న, తెనాలి శ్రావణ్‌కుమార్‌ రాజ్‌భవన్‌లో గవర్నర్‌ బిశ్వభూషణ్‌ హరిచందన్‌ను కలిసి ఈ మేరకు ఫిర్యాదు చేశారు. నాలుగు పేజీల వినతిపత్రంతో పాటు 140 దాడులపై నివేదికలు, పెన్‌డ్రైవ్‌ అందజేశారు. ‘ప్రభుత్వ రహస్య ఎజెండాతోనే వరుస దుర్ఘటనలు జరుగుతున్నాయి. దేవుడికే రక్షణలేని రాష్ట్రంలో ప్రజల పరిస్థితేంటో గమనించాలి. రామతీర్థం ఘటన జరిగిన మరునాడే ముఖ్యమంత్రి విజయనగరం జిల్లాలో పర్యటించారు. విగ్రహ ధ్వంసంపై స్పందించకపోగా ఆలయాన్నీ సందర్శించలేదు. జిల్లాకు ఇన్‌ఛార్జి మంత్రిగా ఉన్న దేవాదాయశాఖ మంత్రీ స్పందించలేదు. ప్రభుత్వ నిర్లక్ష్యంవల్లే తెదేపా అక్కడ ఆందోళన చేపట్టింది’ అని గవర్నర్‌కు వివరించారు.
ఇదీ చదవండి:
నెల్లిమర్లలో ఉద్రిక్తత: వీర్రాజు, జీవీఎల్‌ను అదుపులోకి తీసుకున్న పోలీసులు
