రాష్ట్రవ్యాప్తంగా శరన్నవరాత్రులు.. ఘనంగా జరుగుతున్నాయి. అనంతపురం జిల్లా పుట్టపర్తిలోని ప్రశాంతి నిలయంలో వేద పురుష సప్తాహ జ్ఞానయజ్ఞానికి పండితులు శ్రీకారం చుట్టారు. ఏటా విజయదశమి పురస్కరించుకుని యజ్ఞహోమం చేయడం ఆనవాయితీ. అనంతపురం జిల్లా గుంతకల్లు, పామిడి పరిధిలోని ఆలయాల్లో... వాసవీమాతను పుష్పాలతో ప్రత్యేకంగా అలంకరించారు. మహిళల భక్తి కీర్తనలు, కోలాటాలు, గజ్జల సవ్వడి అలరించాయి.
అష్టాదశ శక్తిపీఠ క్షేత్రం శ్రీశైలంతోపాటు, మహానంది, కడప విజయదుర్గదేవి ఆలయంలో... భక్తులకు అమ్మవారు స్కందమాత రూపంలో దర్శనం ఇచ్చారు. నెల్లూరు దర్గామిట్టలోని శ్రీరాజరాజేశ్వరీ అమ్మవారి దేవస్థానానికి... భక్తులు పోటెత్తారు. ప్రకాశం జిల్లా పొదిలిలో కన్యకాపరమేశ్వరీ అమ్మవారి ఆలయంలో.. అమ్మవారు ధనలక్ష్మీ అవతారంలో భక్తులకు అభయమిచ్చారు. తూర్పుగోదావరి జిల్లా ఒమ్మంగిలో సుమారు 150 మంది భవానీలతో పాటు... 200 వందల మంది భక్తులు ఉత్సవాల్లో పాల్గొన్నారు.
విశాఖ సత్యసాయి ప్రేమసదన్ మందిరంలో... 108 కలశాలు ఊరేగింపుగా తీసుకొచ్చారు. దుర్గాదేవికి షోడశోపచార పూజ నిర్వహించారు. అనకాపల్లి నూకాలమ్మ ఆలయంలో ఊంజలసేవ ఘనంగా నిర్వహించారు. లక్ష్మీదేవీపేటలోని కనకదుర్గమ్మ ఆలయంలో మాల ధరించిన భక్తులు... అగ్నిగుండంలో నడిచారు. కృష్ణాజిల్లా మోపిదేవి సుబ్రహ్మణ్యేశ్వర స్వామి ఆలయంలో... ఐదో రోజు అమ్మవారు శ్రీమహాలక్ష్మీ దేవిగా భక్తులకు అభయ ప్రదానం చేశారు. కుంకుమ పూజకు భక్తులు భారీగా హాజరయ్యారు.
ఇదీ చదవండి:రాష్ట్రవ్యాప్తంగా దేవి నవరాత్రులు..ఆలయాలకు పోటెత్తిన భక్తులు
