సీఎంను కలిసి శుభాకాంక్షలు తెలిపిన పలువురు ప్రముఖులు

పలువురు ప్రముఖులు సీఎం జగన్​ను కలిసి నూతన సంవత్సర శుభాకాంక్షలు తెలిపారు. తితిదే వేద పండితులు ముఖ్యమంత్రిని ఆశీర్వదించారు. సీఎస్ ఆదిత్యానాథ్​దాస్, డీజీపీ గౌతమ్ సవాంగ్ తదితరులు సీఎంను కలిశారు.

ముఖ్యమంత్రి వైఎస్ జగన్​కు నూతన సంవత్సర శుభాకాంక్షలు వెల్లువెత్తాయి. తాడేపల్లి క్యాంపు కార్యాలయంలో సీఎంను కలిసిన పలువురు ప్రముఖులు శుభాకాంక్షలు తెలిపారు. మంత్రులు, ఎంపీలు, ఎమ్మెల్యేలు, సీఎస్ ఆదిత్యానాథ్ దాస్, డీజీపీ గౌతమ్ సవాంగ్ సహా పలు విభాగాల ఉన్నతాధికారులు సీఎం ను కలిశారు.

నూతన సంవత్సరం సందర్భంగా ముఖ్యమంత్రి వైయస్‌ జగన్‌ను తిరుమల తిరుపతి దేవస్థానం వేద పండితులు ఆశీర్వాదం అందించారు. తాడేపల్లిలోని క్యాంపు కార్యాలయానికి వచ్చిన తితిదే పండితులు వేద మంత్రోచ్ఛారణతో సీఎంను ఆశీర్వదించి, ప్రసాదాలు అందజేశారు. విజయవాడ శ్రీ దుర్గామల్లేశ్వరస్వామి దేవస్ధానం వేద పండితులు కూడా సీఎంకు వేద ఆశీర్వాదం అందించారు.

టీటీడీ ఛైర్మన్‌ వైవీ సుబ్బారెడ్డి, దుర్గ గుడి ఛైర్మన్‌ పైలా సోమినాయుడు సీఎంకు నూతన సంవత్సర శుభాకాంక్షలు తెలిపారు. కొత్త సంవత్సరం సందర్భంగా క్యాంపు కార్యాలయంలో సీఎం కేక్ కోశారు. ప్రభుత్వ ప్రధాన కార్యదర్శి ఆదిత్యానాథ్ దాస్, ఐఎఎస్ అధికారులు ఉదయలక్ష్మి, శ్రీలక్ష్మి సహా ఉన్నతాధికారులు పాల్గొన్నారు.

ఇదీ చదవండీ...2020లో చివరి సూర్యోదయ , సూర్యాస్తమయాలు