విజయవాడ నగరపాలక సంస్థ కమిషనర్ బంగ్లాను అటాచ్మెంట్ చేస్తూ... కృష్ణా జిల్లా వాణిజ్య వివాదాల పరిష్కార న్యాయస్థానం ఆదేశాలు ఇచ్చింది. గుత్తేదారు సంస్థకు కార్పొరేషన్ నుంచి బిల్లులు చెల్లించని కారణంగా వారు కోర్టును ఆశ్రయించారు. జేఎన్ఎన్యూఆర్ఎం పథకం కింద 2012లో బీఆర్టీఎస్ రహదారి వెంట మూడు ప్రాంతాల్లో అక్కడి కాలువపై హైదరాబాద్కు చెందిన కాంటెక్ సిండికేట్ సంస్థ బ్రిడ్జిల నిర్మాణం చేసింది. ఆ సంస్థకు బిల్లుల బకాయిలు చెల్లించడంలో నగరపాలక సంస్థ అధికారులు జాప్యం చేశారు. గుత్తేదారు న్యాయస్థానాన్ని ఆశ్రయించగా... ఆర్బిట్రేటర్‌ను నియమించింది. సమస్యను తాము న్యాయస్థానం వెలుపల పరిష్కరించుకుంటామంటూ నగరపాలక సంస్థ అధికారులు అనుమతి పొందారు. తర్వాత ఓ న్యాయవాది సమక్షంలో చర్చలు సాగాయి.
తనకు 18 కోట్ల రూపాయల బిల్లులు చెల్లించాలంటూ గుత్తేదారు కోరగా... 9 కోట్లు చెల్లించేందుకు ఇరువర్గాల మధ్య అవగాహన ఒప్పందం కుదిరింది. ఆపై సొమ్ము చెల్లించేందుకు అధికారులు ప్రభుత్వానికి లేఖ రాశారు. అక్కడి నుంచి సకాలంలో అనుమతి పొందే విషయంలో అధికారులు విఫలమయ్యారు. ఈ విషయంపై.. గుత్తేదారు తిరిగి న్యాయస్థానాన్ని ఆశ్రయించారు. అధికారులు స్పందించని కారణంగా తన అవార్డును అమలు చేయాలంటూ ఎగ్జిక్యూషన్ పిటిషన్ (ఈసీ) వేసి కమిషనర్ బంగ్లా అటాచ్మెంట్ కోసం అనుమతి కోరారు. అందుకు న్యాయస్థానం అంగీకరించి బందరు రోడ్డులోని 2592 చదరపు మీటర్ల విస్తీర్ణంలోని 29.25 కోట్ల రూపాయల విలువైన కమిషనర్ బంగ్లా అటాచ్మెంట్కు గుత్తేదారుకు అనుమతిస్తూ ఆదేశాలు జారీచేసింది.
ఇదీ చదవండి:
