APPS పాఠశాలల్లో బోధన కంటే బోధనేతర పనులపైనే ఉపాధ్యాయులు ఎక్కువ సమయం గడపాల్సి వస్తోంది. విద్యా శాఖ ప్రవేశపెట్టిన వివిధ యాప్‌ల్లో వివరాలు నమోదు చేయడానికి తంటాలు పడుతున్నారు. పిల్లలకు బోధించడానికి ఎనిమిది పిరియడ్లు ఉంటే..ఉపాధ్యాయులు, బోధనేతర సిబ్బంది నిర్వహించాల్సిన యాప్‌లు దాదాపు 13 వరకు ఉంటున్నాయి. వీటిని నిర్వహించడానికే రోజులో రెండు, మూడు గంటలు సమయం పడుతోందని గురువులు గగ్గోలు పెడుతున్నారు. వీటికి తోడు ఇప్పుడు ముఖ ఆధారిత హాజరు విధానానికి మరో యాప్‌ను తీసుకురావడంతో ఉపాధ్యాయ లోకం ఆందోళన చెందుతోంది. ఇప్పటికే ఎంఈవోలు, ప్రధానోపాధ్యాయులకు సెల్ఫీ హాజరును విరమించుకోవాలని వినతి పత్రాలు ఇచ్చారు. యాప్‌లతోనే కూర్చుంటే బోధన సాగించేదెప్పుడని ప్రశ్నిస్తున్నారు.
పాఠశాల స్థాయిలో నిర్వహించే యాప్‌లు ఇవే..
గురువులు వినియోగించాల్సిన యాప్‌లు ఇవే..
ఐఎంఎంఎస్‌ యాప్‌: ఇందులో వంటగది ప్రదేశం, సరకులు నిల్వచోటు, వండే పాత్రలు, చెత్త డబ్బా, విద్యార్థులు తినే ప్రదేశం, మంచినీటి సదుపాయం, చేతుల శుభ్రత, కోడిగుడ్లు, మరుగుదొడ్ల నిర్వహణకు సంబంధించి ఫొటోలు తీసి యాప్‌లో అప్‌లోడ్‌ చేయాలి.
జేవీకే యాప్‌: జగనన్న విద్యాకానుక రూపంలో ఎనిమిది రకాల విద్యా సామగ్రిని పిల్లలకు ఇస్తున్నారు. అవి అందినట్లు పిల్లల తల్లిదండ్రులతో బయోమెట్రిక్‌ తీసుకోవాలి.
అకడమిక్‌ మోనిటరింగ్‌ యాప్‌: పాఠశాలను విద్యాశాఖ ఉన్నతాధికారులు, ఇతర శాఖల అధికారులు పరిశీలించడానికి వచ్చినప్పుడు వారి పరిశీలనా వివరాలను ఇందులో నమోదు చేయాలి.
ఏపీ టెల్స్‌ యాప్‌ : ఉపాధ్యాయులు సెలవులు తీసుకోవాల్సి వస్తే ముందుగా ఈ యాప్‌లో వివరాలు నమోదు చేసి ప్రధానోపాధ్యాయుని అనుమతి తీసుకోవాలి.
బేస్‌లైన్‌ టెస్ట్‌ యాప్‌: విద్యార్థులకు నిర్వహించే పరీక్షల వివరాలు, వారి మార్కులన్నీ ఈ యాప్‌లో నమోదు చేయాలి.
మంత్ర ఆర్డీ యాప్‌: ఉపాధ్యాయులు పాఠశాలలకు రాగానే బయోమెట్రిక్‌ వేయాలి. జేవీకే గురించి తల్లిదండ్రుల అథంటికేషన్‌ తీసుకోవాలి. వీటికోసం డివైస్‌లు ఉపయోగించాలి. ఆ డివైస్‌ పనిచేయాలంటే ఈ యాప్‌ చరవాణిలో డౌన్‌లోడ్‌ చేసుకుని ఉండాలి.
మనబడి నాడు-నేడు యాప్‌: నాడు-నేడు పనులు జరుగుతున్న పాఠశాలల్లో ఈ యాప్‌ను వినియోగిస్తారు. పనులు ఏ దశలో ఉన్నాయి.. సిమెంట్‌, ఐరన్‌, ఇసుక నిల్వలు, బిల్లుల చెల్లింపులు వంటి వివరాలు అందులో నమోదు చేయాలి.
రీడ్‌ ఎలాంగ్‌ యాప్‌: ఏసీపీఎల్‌ ఎఫ్‌ఎం 220 ఆర్డీ యాప్‌, కన్సిస్టెంట్‌ రైమ్స్‌ యాప్‌ వంటివి ఉపాధ్యాయులు నిర్వహించాల్సి ఉంటుంది. ఇప్పుడున్న యాప్‌లలో రోజువారీ నమోదు చేయాల్సినవి ఎక్కువగానే ఉన్నాయి. కొన్ని మాత్రమే సందర్భం బట్టి వినియోగించాల్సి ఉంటుందని ఉపాధ్యాయ సంఘాల నేతలంటున్నారు.
స్టూడెంట్‌ అటెండెన్స్‌ యాప్‌: విద్యార్థుల హాజరు ఈ యాప్‌లో నమోదు చేయాల్సి ఉంటుంది. తొలి పిరియడ్‌ లోపే ఈ ప్రక్రియ పూర్తయిపోవాలి. దీని ఆధారంగానే అమ్మఒడి పథకాన్ని పిల్లలకు వర్తింపజేస్తారు.
దీక్ష యాప్‌: ఆన్‌లైన్‌ శిక్షణలో ఉపాధ్యాయులు పాల్గొనడానికి ఈ యాప్‌ ఉపయోగిస్తారు. బోధనలో వచ్చే మార్పులు, విద్యా ప్రమాణాలు పెరగడానికి ఈ యాప్‌ ద్వారానే గురువులకు శిక్షణ ఇస్తుంటారు.
పాఠశాలల్లో ముఖ గుర్తింపు హాజరు కోసం ఉపాధ్యాయుల తంటాలు
ఏకోపాధ్యాయ పాఠశాలల్లో ఎలా..!
నలుగురైదుగురు ఉపాధ్యాయులున్నచోట యాప్‌ల నమోదు బాధ్యతను ఒక్కొక్కరూ పంచుకోవడానికి వీలుంటుంది. అదే ఏకోపాధ్యాయ పాఠశాలలకు వచ్చేసరికి ఇటు బోధన, యాప్‌ల యాతన ఉన్న ఒక్క ఉపాధ్యాయుడిపైనే పడుతుంది. ఒక్కోసారి ఆ ఉపాధ్యాయుడు సెలవు పెట్టినప్పుడు వేరొక ఉపాధ్యాయున్ని సర్దుబాటు చేస్తుంటారు. అలాంటప్పుడు కొత్త ఉపాధ్యాయునికి అక్కడి వివరాలను ఆన్‌లైన్‌ చేయడం ఎలా అని ప్రశ్నిస్తున్నారు. ముఖ గుర్తింపు హాజరుకు జీపీఎస్‌తో అనుసంధానం చేయడం వల్ల ఒక ఉపాద్యాయుడి స్థానంలో మరొకర్ని పంపించేటప్పుడు ఇబ్బందులు ఎదురవుతాయని చెబుతున్నారు.
మరలా ప్రయత్నించండి అంటూ వస్తోంది ఇలా..
విధుల్లో భాగమే:- లింగేశ్వరరెడ్డి, డీఈవో, అనకాపల్లి
బోధనతోపాటు పాఠశాలకు సంబంధించిన పనులన్నీ విధుల్లో భాగంగానే పరిగణించాల్సి ఉంటుంది. ఇప్పుడున్న యాప్‌లలో కొన్ని ఒకసారి ఉపయోగిస్తే సరిపోతుంది.. రోజువారీ వినియోగించాల్సిన అవసరం లేదు. కొన్ని యాప్‌లు మాత్రమే రోజువారీ నిర్వహించాలి. సాంకేతిక సమస్యలున్న చోట ప్రత్యామ్నాయ ఏర్పాట్లు చేస్తారు. ప్రభుత్వం నుంచి మినహాయింపు వచ్చేవరకు విద్యాశాఖ సూచించిన పనులన్నీ చేయాల్సిందే.
ఇవీ చదవండి:
