కడప జిల్లా కొప్పర్తి పారిశ్రామిక క్లస్టర్లో ఏర్పాటు కానున్న పరిశ్రమలకు ప్రోత్సాహకాల ప్రత్యేక ప్యాకేజీని ఇచ్చేందుకు ప్రభుత్వం ఉత్తర్వులు జారీ చేసింది. పారిశ్రామిక క్లస్టర్కు 'వైఎస్ఆర్ జగనన్న మెగా ఇండస్ట్రియల్ హబ్'గా ప్రభుత్వం నామకరణం చేసింది. కొప్పర్తిలో 3155 ఎకరాల్లో ఏర్పాటు చేయనున్న మెగా ఇండస్ట్రియల్ హబ్లో 810 ఎకరాల్లో ఎలక్ట్రానిక్ మాన్యుఫ్యాక్చరింగ్ క్లస్టర్ ఏర్పాటు చేయాలని ప్రభుత్వం నిర్ణయించింది.
మొత్తం 25 వేల కోట్ల పెట్టుబడులతో పాటు 2.5 లక్షల మందికి ఉపాధి కలుగుతుందని ప్రభుత్వం పేర్కొంది. పరిశ్రమలకు ప్రోత్సాహకాలుగా కొప్పర్తిలోని ఎలక్ట్రానిక్ మాన్యూఫాక్చరింగ్ క్లస్టర్లో 33 ఏళ్ల లీజు ప్రాతిపదికన భూమిని కేటాయించనున్నారు. లీజు కాలాన్ని 99 ఏళ్లకు పెంచుకునేందుకు అవకాశముందని ప్రభుత్వం స్పష్టం చేసింది. మెగా ఇండస్ట్రియల్ క్లస్టర్లో ఏర్పాటయ్యే పరిశ్రమలకు స్టాంపు డ్యూటీని 100 శాతం మినహాయిస్తూ ఉత్తర్వులు ఇచ్చారు. ఐదేళ్ల పాటు యూనిట్కు రూపాయి చొప్పున రీఎంబర్సుమెంటు ఉంటుందని స్పష్టం చేశారు. మూల ధన పెట్టుబడులపై రూ.10 కోట్ల వరకూ పెట్టుబడి సబ్సీడీని ప్రభుత్వం ప్రకటించింది. వడ్డీపై 5 శాతం చొప్పున ఏడాదికి రూ.1.5 కోట్ల వరకూ రాయితీని ఐదేళ్లపాటు ఇచ్చేందుకు అంగీకరించింది. మూలధన పెట్టుబడిపై 100 శాతం ఎస్జీఎస్టీ రీఎంబర్సును ప్రభుత్వం ప్రకటించింది. రవాణాపైనా 25 శాతం వరకూ రాయితీ ఇస్తామని స్పష్టం చేసింది.
ఇదీ చదవండి:
