హైదరాబాద్ నాంపల్లి ఎగ్జిబిషన్ సొసైటీ కార్యాలయంలో అవినీతి నిరోధక శాఖ అధికారులు సోదాలు నిర్వహించారు. సొసైటీ లావాదేవీల వ్యవహారంలో అధికారులు ఆరాా తీస్తున్నారు. పలు డాక్యుమెంట్లను పరిశీలిస్తున్నారు. గత ఆరేళ్లుగా ఎగ్జిబిషన్ సొసైటీ అధ్యక్షుడిగా ఉన్న మాజీ మంత్రి ఈటల రాజేందర్.. ఇటీవల తన పదవికి రాజీనామా చేశారు. ఈ క్రమంలోనే అనిశా అధికారులు దాడులు నిర్వహించడం ప్రాధాన్యం సంతరించుకుంది.
స్పందించిన సొసైటీ కార్యదర్శి..
నాంపల్లి ఎగ్జిబిషన్ సొసైటీలో అనిశా తనిఖీలపై.. సొసైటీ కార్యదర్శి స్పందించారు. తమ సొసైటీలో ఎటువంటి అక్రమాలు జరగలేదని స్పష్టం చేశారు. సొసైటీ కార్యకలాపాలు పారదర్శకంగా జరుగుతున్నాయని.. తొలిసారి అనిశా సోదాలు జరిగినట్లు చెప్పారు. రికార్డులు అనిశా అధికారులకు చూపించినట్లు తెలిపారు. ఖాతాలన్నీ ప్రతి సంవత్సరం ఆడిట్ చేస్తున్నామని స్పష్టం చేశారు. సొసైటీ సావేశాలకు మాజీ మంత్రి ఈటల రాజేందర్ ఎన్నడూ హాజరుకాలేదని కార్యదర్శి వెల్లడించారు.
అసలేం జరిగిందంటే..
ఇటీవల భూకబ్జా ఆరోపణలతో తెలంగాణ కేబినెట్ నుంచి ఈటలను తప్పించారు సీఎం కేసీఆర్. తదనంతర పరిణామాల్లో ఈటల.. తన ఎమ్మెల్యే పదవికి రాజీనామా చేసి భాజపాలో చేరారు. తను బానిసను కానని.. తెలంగాణ మంత్రులకు భావ ప్రకటన స్వేచ్ఛ లేదని ప్రభుత్వంపై ఘాటైన విమర్శలు చేశారు. తన భార్య జమునా పేరిట ఉన్న హాచరిస్ స్థల వివాదంపై కూడా ఈటల తనదైన శైలిలో స్పందించారు. ఈ విషయంపై హైకోర్టును కూడా ఆశ్రయించారు. కోర్టులో తమకు న్యాయం జరుగుతుందని ధీమా వ్యక్తం చేశారు. ఈ పరిణామాల క్రమంలోనే ఆయన.. నాంపల్లి సొసైటీ అధ్యక్ష పదవికి కూడా రాజీనామా చేశారు. ఈ క్రమంలోనే అనిశా దాడులు జరగటం.. ఆసక్తిని రేపుతోంది. అయితే హుజురాబాద్ ఉప ఎన్నికలో తనను ఓడించేందుకే అధికార పార్టీ.. ఇటువంటి రాజకీయాలకు పాల్పడుతోందని.. ఇప్పటికే ఈటలతో పాటు ఆయన అనుచరులు ప్రభుత్వంపై విమర్శలు గుప్పిస్తున్నారు.
ఇదీచదవండి.
