వృద్ధాప్యంలో ఒంటరైన వారిని తమ అమ్మానాన్నల్లా భావించి పిడికెడు అన్నం పెడుతున్నారు కొందరు ఔత్సాహికులు. ఆసరా లేని ఆ పెద్దవాళ్లను ఆప్యాయంగా పలకరిస్తూ ప్రేమను పంచుతున్నారు. అనాథలైన వారిని దత్తత తీసుకుని అవసరాలు తీరుస్తున్నారు. వారిని అవ్వ, అక్క, తాత అంటూ వరసలు కలిపి పిలుస్తూ.. కుటుంబసభ్యుల్లా ఆదుకుంటున్నారు. తెలంగాణలోని హనుమకొండ జిల్లాలోని పలు గ్రామాల్లో విస్తరిస్తున్న ఈ మానవీయ సంస్కృతిపై ప్రత్యేక కథనం. ఉమ్మడి వరంగల్‌ జిల్లాలోని 18 గ్రామాల్లో 42 మంది వృద్ధులకు స్థానికులు అండగా నిలుస్తూ మానవత్వాన్ని చాటుకుంటున్న తీరు ఆదర్శంగా నిలుస్తోంది.
బాలవికాస సంస్థ అనుసంధానకర్తగా ఈ బృహత్కార్యానికి బాటలు పడ్డాయి. సంస్థ వ్యవస్థాపకురాలు బాల థెరిసా. వరంగల్‌ జిల్లా వర్ధన్నపేట మండలం రెడ్డిపాలేనికి చెందిన ఆమె కెనడాకు వెళ్లి ఆ దేశీయుడినే వివాహం చేసుకున్నారు. అక్కడ ‘సోపార్‌’ అనే పేరుతో సేవా కార్యక్రమాలు మొదలుపెట్టారు. తర్వాత వాటిని వరంగల్‌కు విస్తరించారు. ఇప్పటికి 1500 తాగునీటి కేంద్రాలు, మహిళా చైతన్య కార్యక్రమాలు, సేంద్రియ సేద్యం, పిల్లల దత్తత వంటి కార్యక్రమాలు చేపట్టారు. ఆమెను అంతా బాలక్క అంటూ పిలుస్తారు.
మేమున్నామంటూ ముందుకొచ్చి.. : బాల థెరిసా ఓసారి వరంగల్‌కు వచ్చినప్పుడు నిస్సహాయులైన వృద్ధులను చూసి స్పందించారు. వారికి ఊతం అందించాలనే ఆలోచన కలిగింది. అలా వృద్ధుల దత్తత కార్యక్రమానికి సుమారు 15 ఏళ్ల కిందటే బీజం పడింది. బాలవికాసకు మహిళా సభ్యులున్న అన్ని గ్రామాల్లో వృద్ధులకు సాయం అందించడం ప్రారంభించారు. కెనడాలో ఉండే ఓ దాత వీరికి కావాల్సిన సామగ్రి సమకూర్చేవారు. కొన్నేళ్ల తర్వాత ఆ దాత కన్నుమూయడంతో ఈ పథకం సందిగ్ధంలో ఏర్పడింది.
బాలవికాస కింద అనేక మహిళా సంఘాలు గ్రామాల్లో ఉన్నాయి. వారితో నిర్వాహకులు ఈ విషయం చెప్పగా.. తమకున్న దాంట్లో వృద్ధులకు కొంత ఇస్తామని ముందుకొచ్చారు. ఏటా రెండు, మూడుసార్లు బాలవికాస హనుమకొండ జిల్లా ధర్మసాగర్‌ మండలం మల్లక్‌పల్లిలో శిబిరం ఏర్పాటు చేస్తుంది. అక్కడికి మహిళలు, ఇతర దాతలు వచ్చి వృద్ధులకు నగదు, బియ్యం సహా 12 రకాల నిత్యావసర సామగ్రి అందజేస్తున్నారు. వీరు ఎంపిక చేసుకున్న ప్రతి గ్రామంలో ముగ్గురు నలుగురు వృద్ధులుంటే అక్కడ వారి అవసరాలు తీర్చేందుకు అంతే సంఖ్యలో దాతలు ముందుకొస్తున్నారు. బాల వికాస మహిళా సమన్వయకర్తలు అనాథ వృద్ధుల్ని గుర్తిస్తూ వారికి సాయం చేసేలా దాతలను అనుసంధానం చేస్తున్నారు. ప్రభుత్వం ఇచ్చే వృద్ధాప్య పింఛనుకు తోడుగా వీరిచ్చే ఆర్థిక సాయంతో పెద్దవారి అవసరాలు తీరుతున్నాయి.
ఆదాయం కొంచెం.. ఆప్యాయత ఘనం.. కూనూరుకు చెందిన పారిజాతకు కూలి పనులే జీవనాధారం. ఆ కొద్దిపాటి సంపాదనలోనూ కొంత మొత్తాన్ని తన ఇంటి వద్ద ఉంటున్న వృద్ధురాలు వెంకటమ్మ కోసం ఆమె వెచ్చిస్తున్నారు. అక్కా అంటూ ఆప్యాయంగా పిలుస్తూ నిత్యావసరాలు సమకూరుస్తున్నారు.
కన్నకొడుకులా.. కంటికి రెప్పలా.. జనగామ జిల్లా జఫర్‌గడ్‌ మండలం కూనూరుకు చెందిన దాట్ల నర్సయ్య వయసు 75 సంవత్సరాలు. భార్య కొన్ని దశాబ్దాల కిందట చనిపోయింది. పిల్లలు లేరు. నాలుగడుగులు కూడా వేయలేని నిస్సహాయస్థితిలో ఆయనకు కన్న కొడుకులా అండగా నిలిచారు గ్రామానికి చెందిన ఈగ కృష్ణమూర్తి. నర్సయ్య అవసరాలు తీరుస్తూ తోడ్పడుతున్నారు.
ఇవీ చదవండి :
