కేంద్ర ఆర్థికశాఖ 15వ ఆర్థికసంఘం సిఫార్సుల మేరకు దేశవ్యాప్తంగా ఉన్న గ్రామీణ స్థానిక సంస్థలకు మంగళవారం రూ.13,385.70 కోట్ల టైడ్‌ గ్రాంట్‌ విడుదల చేసింది. 2021-22 ఆర్థిక సంవత్సరంలో తొలివాయిదా కింద ఈ మొత్తాన్ని ఇచ్చింది. ఇందులో తెలంగాణకు రూ.409.5 కోట్లు, ఆంధ్రప్రదేశ్‌కు రూ.581.7 కోట్లు దక్కాయి. ఈ మొత్తాన్ని స్థానిక సంస్థలు తాగునీటి సరఫరా, వాననీటి సంరక్షణ, పారిశుద్ధ్యం, మరుగుదొడ్ల నిర్మాణానికి ఉపయోగించాల్సి ఉంటుంది. కేంద్రప్రాయోజిత పథకాల కింద కేంద్రం తాగునీరు, పారిశుద్ధ్యం కోసం విడుదల చేసే నిధులకు అదనంగా ఈ మొత్తాన్ని విడుదల చేసినట్లు పేర్కొంది. ఈ మొత్తం అందిన పదిరోజుల్లోపు రాష్ట్ర ప్రభుత్వాలు వాటిని స్థానిక సంస్థల ఖాతాలకు బదిలీచేయాలని స్పష్టం చేసింది. ఒకవేళ అంతకుమించి జాప్యమయితే రాష్ట్ర ప్రభుత్వాలు ఆ కాలానికి వడ్డీ చెల్లిస్తూ నిధులు ఇవ్వాల్సి ఉంటుందని పేర్కొంది.
ఇదీ చదవండి: ఇంటర్మీడియట్ సీట్ల భర్తీకి ఆన్లైన్ దరఖాస్తుల స్వీకరణ
