Mutual Funds SIP : మనం సంపాదించే మొత్తంలో నుంచి రోజూ కొంత డబ్బును ఆదా చేస్తే కొంత కాలానికే మనం కోటీశ్వరులుగా మారే అవకాశం కల్పిస్తుంది మ్యూచువల్ ఫండ్స్లోని 'సిప్' పద్ధతి. సిప్ అంటే 'సిస్టమాటిక్ ఇన్వెస్ట్మెంట్ ప్లాన్'. రోజుకు రూ.100 పొదుపు చేసి.. మ్యూచువల్ ఫండ్స్లో సిప్ పద్ధతిలో ఇన్వెస్ట్ చేస్తే కొన్నేళ్లకే పెద్ద మొత్తంలో రిటర్న్స్ను సంపాదించవచ్చు. ఇలా రోజూ వంద రూపాయలను ఆదా చేసి ప్రతి నెలా చిన్న మొత్తంలో మీరు మ్యూచువల్ ఫండ్స్లో మదుపు చేస్తే గనుక 30 సంవత్సరాల తర్వాత మీరు రూ.కోటికిపైనే రాబడిని పొందవచ్చు.
SIP Interest Rate : ఉదాహరణకు.. మీరు రోజూ రూ.100 ఆదా చేస్తే ప్రతి నెలా మీ దగ్గర రూ.3000 జమ అవుతుంది. ఈ మొత్తాన్ని(రూ.3000) మీరు ప్రతి నెలా సిప్ విధానంలో ఇన్వెస్ట్ చేస్తే గనుక దానిపై మీకు 12 శాతం యానువల్ రిటర్న్స్ జమ అవుతాయి. ఆ మొత్తం కాస్త 30 ఏళ్లల్లో రూ.1,05,89,741గా మారుతుంది. అంటే దాదాపుగా కోటి ఆరు లక్షలు ఆ సమయానికి మీ చేతికి అందుతాయి.
SIP Investment : అయితే ఇందులో మీ పెట్టుబడి కేవలం రూ.10,80,000 మాత్రమే. కాగా 30 ఏళ్లు వచ్చే సరికి ఈ మొత్తం రూ.95,09,741(అంచనా)గా ఉంటుంది. అయితే మీరు గుర్తుపెట్టుకోవాల్సిన విషయం ఏంటంటే.. మీరు పెట్టిన పెట్టుబడిపై వచ్చే రాబడి విషయంలో ఎటువంటి హామీ ఉండదు. ఎందుకంటే మ్యూచువల్ ఫండ్స్లోని సిప్ పద్ధతిలో మదుపు చేయడంమంటేనే రిస్క్తో కూడుకున్న అంశం. అందుకే మార్కెట్ ఒడుదొడుకులను బట్టి కూడా మీ రాబడి విషయంలో వ్యత్యాసం ఉండవచ్చు.
రోజువారీ సిప్ ఆప్షన్..
SIP Plan : అనేక మ్యూచువల్ ఫండ్హౌస్‌లు రోజువారీ సిప్ ప్లాన్లను కూడా మదుపరులకు అందిస్తున్నాయి. మ్యూచువల్ ఫండ్స్లో రోజూవారీ పద్ధతిలో కూడా క్రమంగా కొంత మొత్తాన్ని ఇన్వెస్ట్ చేయవచ్చు. దీన్నే డైలీ సిస్టమాటిక్ ఇన్వెస్ట్మెంట్ ప్లాన్ (సిప్) అని కూడా అంటారు. ఈ విధానం పెట్టుబడిదారుల ఆర్థిక అవసరాల మేరకు మదుపు చేసేందుకు వీలుగా ఉండటమే కాకుండా తక్కువ మొత్తాల్లో పెట్టుబడి పెట్టి దీర్ఘకాలంలో ఏకమొత్తంగా(లంప్సమ్)అమౌంట్ను పొందవచ్చు.
SIP Mutual Funds Returns : అయితే పెట్టుబడిదారులు ఈ రకమైన పెట్టుబడి ప్రణాళికలో చిన్న చిన్న మొత్తాల్లో పెట్టుబడి పెట్టి దీర్ఘకాలంలో పెద్దమొత్తంలో లాభం పొందుతున్నారని అసోసియేషన్ ఆఫ్ మ్యూచువల్ ఫండ్స్ ఇన్ ఇండియా (ఏఎమ్ఎఫ్ఐ) విడుదల చేసిన ఓ నివేదిక చెబుతోంది. ఈ పద్ధతిని ఎందుకు ఎంచుకోవచ్చనే దానికి గల కారణాలను కూడా విశ్లేషించింది.
మేలో సిప్ జోరు..
AMFI SIP Data : ఈ మధ్యకాలంలో చాలామంది మ్యూచువల్ ఫండ్స్లో సిప్ ద్వారా పెట్టుబడులు పెట్టేందుకు ఎక్కువగా ఆసక్తి చూపిస్తున్నారని అసోసియేషన్ ఆఫ్ మ్యూచువల్ ఫండ్స్ ఇన్ ఇండియా (ఏఎమ్ఎఫ్ఐ) వెల్లిడించింది. 2023-24 ఆర్థిక సంవత్సరం మే నెలలో స్టాక్ మార్కెట్లు పుంజుకోవడం వల్ల ఎక్కువమంది మ్యూచువల్ ఫండ్స్లో సిప్ పద్ధతిలోనే పెట్టుబడులు పెట్టారని ఏఎమ్ఎఫ్ఐ నివేదించింది. దీంతో మే నెలలో ఇన్ఫ్లో రూ.14,749 కోట్లతో గరిష్ఠ స్థాయికి చేరుకుందని ప్రకటించింది. మ్యూచువల్ ఫండ్స్ ఇండస్ట్రీ నిర్వహించే ఆస్తులు కూడా మే నెలలో మొత్తం రూ.43.2 లక్షల కోట్లతో గరిష్ఠ స్థాయికి చేరిందని.. రూ.45,234 కోట్ల మేర నికర ఇన్ఫ్లో లిక్విడ్ ఫండ్స్ రూపంలో వచ్చాయని ఏఎమ్ఎఫ్ఐ ఓ ప్రకటనలో తెలిపింది.
అయితే గత మార్చిలో సిప్ ఇన్ఫ్లో రూ.14,276 కోట్లుగా ఉంది. ఇది మునుపటి ఏడాదితో పోలిస్తే అధికమని ఏఎమ్ఎఫ్ఐ వెల్లడించింది. ఈ ఆర్థిక సంవత్సరం ఏప్రిల్లో సిప్ ఇన్ఫ్లో రూ.13,728 కోట్లకు తగ్గగా.. మే నెలలో రూ.14,749 కోట్ల మేర ఇన్ఫ్లో మ్యూచువల్ ఫండ్స్ సిప్ రూపంలో వచ్చాయని ఏఎమ్ఎఫ్ఐ నివేదించింది. అంతేకాకుండా ఈ ఆర్థిక సంవత్సరం మే నెలలో కొత్తగా 25 లక్షల సిప్ ఖాతాలు పెట్టుబడిదారులు తెరిచారని.. దీనితో వీటి సంఖ్య 6.5 కోట్లకు చేరిందని, ఇది ఆల్టైమ్ హై అని పేర్కొంది.
