Mercedes Most expensive car: ప్రపంచంలోనే అత్యంత ఖరీదైన కారును విక్రయించినట్లు తెలిపింది దిగ్గజ సంస్థ మెర్సిడెస్. 1955 నాటి మెర్సిడెస్ బెంజ్ ఎస్ఎల్ఆర్ కూపే మోడల్ వేలం పాటలో 142 మిలియన్ డాలర్లకు అమ్ముడుపోయినట్లు తెలిపింది. కార్ల చరిత్రలోనే మరే ఇతర కారుకు ఇంత ధర పలికిన దాఖలాలు లేవు. ఈ వేలం పాట ద్వారా వచ్చిన డబ్బును గ్లోబల్ స్కాలర్షిప్ ఫండ్ కోసం ఉపయోగిస్తామని మెర్సిడెస్ తెలిపింది.
2018లో 1963లో తయారైన ఫెర్రారీ 250 జీటీఓకు వేలంపాటలో 70మిలియన్ డాలర్లు దక్కాయి. ఆ తర్వాత మెర్సిడెస్ కారుకే భారీ ధర పలికింది. 67 ఏళ్ల నాటికి మెర్సిడెస్ బెంజ్ ఎస్ఎల్ఆర్ కూపే మోడల్లో రెండు కార్లు మాత్రమే ఉన్నాయి. అప్పటి చీఫ్ ఇంజినీర్ పేరు ఈ కారుకు పెట్టారు. గంటకు 186 కిలోమీటర్ల వేగంతో ప్రయాణించగలదు. 300 హార్స్పవర్తో 8 సిలిండర్ల ఇంజిన్ ఉంటుంది. కారు డోర్లు పైకి ఉంటాయి. ఎలాంటి వాతావరణ పరిస్థితుల్లోనైనా డ్రైవర్కు రక్షణ కల్పించడం దీని ప్రత్యేకత.
మే 5న జర్మనీలోని స్టట్గర్ట్లో మెర్సిడెస్ బెంజ్ మ్యూజియంలో ఈ వేలం పాటను ప్రైవేటుగా అతికొద్ది మంది సమక్షంలో నిర్వహించినట్లు తెలుస్తోంది. అయితే దీన్ని ఎవరు దక్కించుకున్నారనే విషయంపై మాత్రం స్పష్టత లేదు. వేలంపాటలో పాల్గొన్న కార్ డీలర్ బ్రయాన్ రాబోల్డ్ మాత్రం తన క్లయింట్ కోసం కారను కొనుగోలు చేసినట్లు చెప్పారు.
ఇదీ చదవండి: క్రికెట్ వ్యాపారంలోకి సత్య నాదెళ్ల.. ఐపీఎల్ వైపు చూస్తారా..?
