Life Insurance Tax Benefits vs Life Insurance coverage : కష్టకాలంలో కుటుంబానికి ఆర్థిక రక్షణ (ఇన్సూరెన్స్ కవరేజ్) కల్పించడం కోసం జీవిత బీమా తీసుకుంటూ ఉంటాం. అయితే చాలా మంది పన్ను ఆదా (టాక్స్ సేవింగ్) అవుతుందనే ఉద్దేశంతో తక్కువ ప్రీమియం, తక్కువ బీమా కవరేజ్ ఉంటే పాలసీలను ఎంచుకుంటూ ఉంటారు. కానీ ఇది ఏ మాత్రం సరికాదు అని ఆర్థిక నిపుణులు చెబుతున్నారు.
ఆర్థిక రక్షణ కావాలి!
ఆర్థిక సంవత్సరం ముగుస్తున్న నేపథ్యంలో చాలా మంది పన్ను ఆదా గురించి ఆలోచనలు మొదలుపెడతారు. ముఖ్యంగా పన్ను మినహాయింపు కోసం జీవిత బీమా పాలసీలను ఎంచుకునేందుకు ప్రయత్నిస్తుంటారు. అయితే ఇక్కడ గుర్తించుకోవాల్సిన విషయం ఏమిటంటే.. బీమా పాలసీలను కుటుంబానికి ఆర్థిక రక్షణ కల్పించడం కోసం ఎంచుకోవాలి. అంతేకాని కేవలం పన్ను ఆదా కోసమే వాటిని ఎంచుకోకూడదు.
పాత పన్ను చట్టాలు ఏం చెబుతున్నాయి?
పాత ఆదాయపు పన్ను విధానం ఎంచుకున్న వారు సెక్షన్‌ 80సీ ప్రకారం, రూ.1,50,000 పరిమితి వరకూ వివిధ పెట్టుబడి పథకాల్లో మదుపు చేసుకోవచ్చు. ఇందులో జీవిత బీమా పాలసీలకు చెల్లించే ప్రీమియంలూ ఉంటాయి.
ఆర్థిక రక్షణకే ప్రాధాన్యం!
జీవిత బీమా ప్రధాన లక్ష్యం.. అనుకోని కష్టం వచ్చినప్పుడు కుటుంబానికి ఆర్థికంగా రక్షణ కల్పించడం. వాస్తవానికి చాలా మంది పన్ను ప్రయోజనాల కోసం.. తక్కువ ప్రీమియం ఉన్న పాలసీలను ఎక్కువ సంఖ్యలో కొనుగోలు చేస్తూ ఉంటారు. దీనివల్ల వారి పన్ను ఆదా లక్ష్యం నెరవేరుతుంది. కానీ, కుటుంబానికి అవసరమైన రక్షణ మాత్రం లభించకపోవచ్చు.
అవసరాలకు అనుగుణంగా!
ముందుగా మీకు ఎంత బీమా కవరేజ్ అవసరమో చూసుకోండి. మీ ఆదాయం, జీవన శైలి, బాధ్యతలు, అప్పులు అన్నీ లెక్కించుకొని ఎంత విలువైన పాలసీని తీసుకోవాలో నిర్ణయించుకోండి. వాస్తవానికి ప్రతి వ్యక్తి తన వార్షికాదాయానికి కనీసం 10 నుంచి 12 రెట్లు కవరేజ్ ఉండేలా జీవిత బీమా పాలసీ తీసుకోవడం మంచిది. అంతేకానీ, కేవలం పన్ను ఆదా కోసం.. తక్కువ మొత్తం కవరేజ్ ఉండే పాలసీని తీసుకోవడం ఏమాత్రం శ్రేయస్కరం కాదు.
పన్ను మినహాంపు- అదనపు ప్రయోజనం మాత్రమే!
మీ కుటుంబానికి పూర్తి ఆర్థిక రక్షణ కల్పించే విధంగా పాలసీని తీసుకోవాలి. పన్ను ఆదా కావడం అనేది కేవలం ఆ పాలసీ కల్పించే అదనపు ప్రయోజనంగానే చూడాలి.
తొలిసారిగా పాలసీ తీసుకుంటున్నారా?
ఇప్పటి వరకూ బీమా పాలసీ తీసుకోని వారు.. టర్మ్ పాలసీకి ప్రాధాన్యం ఇవ్వాలి. టర్మ్ పాలసీ వల్ల తక్కువ ప్రీమియానికి, అధిక రక్షణ లభిస్తుంది. పైగా పన్ను ప్రయోజనం కూడా కలుగుతుంది. వాస్తవానికి టర్మ్ పాలసీ తీసుకున్నవారు.. ఏటా దానిని పునరుద్ధరించుకోవాల్సి ఉంటుంది.
సాధారణ టర్మ్ పాలసీలను ఎంచుకుంటే.. గడువు తీరిన తర్వాత ఎలాంటి మొత్తమూ వెనక్కి రాదు. అయితే ఇప్పుడు కొత్తగా కొన్ని టర్మ్ పాలసీలు ప్రీమియం వెనక్కి ఇస్తామని చెబుతున్నాయి. వీటికి కాస్త అధిక ప్రీమియం చెల్లించాల్సి ఉంటుంది. మీకు అధిక ప్రీమియంలు చెల్లించడం ఇష్టం లేకపోతే.. సాధారణ టర్మ్ పాలసీలను ఎంచుకునే ప్రయత్నం చేయవచ్చు. ఒక వేళ ఎప్పుడైనా మీకు ఈ పాలసీ అవసరం లేదు అనుకుంటే.. ప్రీమియం చెల్లింపును కావాలనుకున్నప్పుడు ఆపేయవచ్చు. అంతేకాదు మీ అవసరాలకు అనుగుణంగా పాలసీ విలువనూ పెంచుకోవచ్చు..
సంపద సృష్టి కోసం..
కుటుంబ ఆర్థిక రక్షణ కోసం పాలసీని తీసుకున్న తర్వాత సంపద సృష్టి కోసం కూడా బీమా పాలసీలను ఎంచుకోవచ్చు. ముఖ్యంగా యూనిట్‌ ఆధారిత బీమా పాలసీలు (యులిప్‌), ఎండోమెంట్‌ పాలసీలు లాంటి వాటిని పరిశీలించాలి. యులిప్‌లను ఎంచుకునేటప్పుడు ఎన్నేళ్లపాటు, ఎంత ప్రీమియం చెల్లించాలి అనే విషయం గమనించాలి. కనీసం అయిదేళ్లపాటు ప్రీమియం చెల్లిస్తేనే ఈ పాలసీలకు స్వాధీన విలువ వస్తుంది. మార్కెట్‌ హెచ్చుతగ్గుల ప్రభావం వీటిపై ఉంటుంది. కనుక దీర్ఘకాలిక దృష్టితో ఈ పాలసీలను ఎంచుకోవాలి. చిన్న వయస్సులో ఉన్న వారు యులిప్‌లను ఎంచుకున్నప్పుడు ఈక్విటీ ఆధారిత ఫండ్లకు ప్రాధాన్యం ఇవ్వాలి. దీనివల్ల 15 ఏళ్ల తర్వాత మంచి రాబడిని అందుకునేందుకు వీలవుతుంది.
సమీక్షించుకోండి!
ఇప్పటికే జీవిత బీమా పాలసీలు తీసుకుని ఉంటే.. ఒకసారి వాటిని సమీక్షించుకోండి. మీ ఆర్థిక పరిస్థితులు, బాధ్యతలు, జీవన శైలి, ద్రవ్యోల్బణం లాంటి అంశాలను పరిగణనలోకి తీసుకొని, ఆ మేరకు బీమా కవరేజ్ ఉందా? లేదా? చూసుకోండి. అప్పుడే మీ కుటుంబం ఎలాంటి క్లిష్ట పరిస్థితులనైనా తట్టుకొని, నిలబడగలదని గుర్తుంచుకోండి.
15వ విడత పీఎం కిసాన్ నిధులు మీ ఖాతాలో జమ అయ్యాయా? చెక్ చేసుకోండిలా!
అప్పు లేకుండా పిల్లల పెళ్లి చేయాలా? - ఈ సూపర్ ఫైనాన్షియల్ టిప్స్ మీకోసమే!
