గూగుల్ పే.. పాపులర్ ఆన్లైన్ పేమెంట్ యాప్. ప్రపంచవ్యాప్తంగా కోట్ల మంది ఈ యాప్ను వినియోగిస్తున్నారు. దీన్ని ఉపయోగించి ఇతరులకు డబ్బును సులభంగా, సురక్షితంగా పంపించవచ్చు, వారిని నుంచి స్వీకరించవచ్చు. ఆన్లైన్లో కొనుగోళ్లు సైతం చేయవచ్చు. ఇంత మంది ఈ యాప్ను వాడుతున్నప్పటికి చాలా మందికి గూగుల్ పేలో ఉండే బేసిక్ ఫీచర్లు మాత్రమే తెలుసు. కానీ ఇందులో ఉండే అడ్వాన్స్డ్ ఫీచర్లు చాలా తక్కువ మందికి తెలిసి ఉంటాయి. ఈ ఫీచర్లతో ఎటువంటి శ్రమ లేకుండా.. ఈజీగా చెల్లింపులు చేయవచ్చు. అవేంటో..? అవి ఎలా ఉపయోగపడతాయో తెలుసుకుందాం.
- రిక్వెస్ట్ మనీ..
ఎవరైనా మీకు డబ్బు ఇవ్వాల్సి ఉన్నప్పుడు.. లేక వారినే డబ్బు అడగాల్సి వచ్చినప్పుడు ఈ రిక్వెస్ట్ ఫీచర్ బాగా ఉపయోగపడుతుంది. మీకు ఎంత డబ్బు కావాలో ముందుగానే వారికి తెలియజేయవచ్చు. అందుకోసం రిక్వెస్ట్ బటన్ నొక్కి.. అమౌంట్ ఎంటర్ చేసి.. అవతలి వారికి పంపిస్తే సరిపోతుంది. దీనికి నోట్ కూడా జత చేయవచ్చు. ఎందు కోసం ఈ డబ్బును రిక్వెస్ట్ చేశారో వారికి తెలియజేయవచ్చు. - స్ల్పిట్ బిల్స్..
ఈ ఫీచర్తో అమౌంట్ను ఈజీగా విభజించవచ్చు. అంటే ఎవరెవరు ఎంత చెల్లించాలో గూగుల్ పేనే లెక్కేసి చెబుతుంది. ఇందుకోసం ఓ గూగుల్ పే గ్రూప్ను క్రియేట్ చేసుకోవాలి. అందులో కుటుంబసభ్యులను లేక స్నేహితులను యాడ్ చేసుకోవాలి. గ్రూప్లో చెల్లించాల్సిన బిల్ను షేర్ చేయాలి. ఎవరెవరు డబ్బు చెల్లించాలో వారిని సెలెక్ట్ చేసుకోవాలి. ఆ తరువాత 'గూగుల్ పే' ఎవరెవరు ఎంత చెల్లించాలో లెక్కకడుతుంది. ఇక దాని ప్రకారమే డబ్బు చెల్లించవచ్చు. - క్యూఆర్ కోడ్..
చాలా షాపుల్లో క్యూఆర్ కోడ్ బోర్డులు ఉండటం మనం చూస్తునే ఉంటాం. ఆ క్యూఆర్ కోడ్ను ఫోటో తీసి.. దాని ప్రకారం చెల్లింపులు చేస్తుంటాం. అయితే మనం కూడా ఈ క్యూఆర్ కోడ్ను జనరేట్ చేయవచ్చు. దాన్ని ఉపయోగించి ఇతరుల నుంచి డబ్బును స్వీకరించవచ్చు. అవతలి వారికి మన నంబర్, వివరాలు ఇవ్వకుండానే లావాదేవి జరపడానికి ఈ ఫీచర్ ఉపయోగపడుతుంది. - బ్యాంక్ అకౌంట్ ద్వారా డబ్బును పంపడం..
ఈ ఫీచర్ను ఉపయోగించి డైరెక్ట్గా బ్యాంక్ అకౌంట్కే డబ్బులు పంపించవచ్చు. అందుకోసం పేమెంట్ చేసేటప్పుడు బ్యాంక్ ట్రాన్స్ఫర్ ఆప్షన్ను క్లిక్ చేయాలి. అందులో బ్యాంక్ వివరాలను నమోదు చేయాలి. చెల్లించాల్సిన అమౌంట్ను ఎంటర్ చేసి.. సెండ్ బటన్ నొక్కాలి. దీంతో మనం పంపించిన అమౌంట్ అవతలి వారి బ్యాంక్ ఖాతాలో జమ అవుతుంది. - రిమైండర్..
కొన్ని సార్లు మనం పేమెంట్ చేయడం మరిచిపోతుంటాం. అలా మరిచిపోకుండా ఉండేందుకు ఈ రిమైండర్ ఫీచర్ చాలా ఉపయోగపడుతుంది. అద్దె, సబ్‌స్క్రిప్షన్‌ల వంటి వాటి చెల్లింపులు సరైన సమయంలో చెల్లించేందుకు ఇది సహాయపడుతుంది. ఒక్కసారి రిమైండర్ సెట్ చేస్తే చాలు.. పేమెంట్ డ్యూ టైమ్ వచ్చినప్పుడు మనకు నోటిఫికేషన్ వస్తుంది.
