టెక్ దిగ్గజం ఐబీఎం.. అమెరికాకు చెందిన తమ ఉద్యోగులంతా వీలైనంత త్వరగా కరోనా వ్యాక్సిన్ వేసుకోవాలని సూచించింది. డిసెంబర్ 8లోగా రెండు డోసుల కొవిడ్ టీకా తీసుకోవాలని స్పష్టం చేసింది. లేదంటే వేతనం లేకుండా విధుల నుంచి తప్పించాల్సి వస్తుందని పేర్కొంది.
అమెరికాలో పని చేసే ఉద్యోగులు, కాంట్రాక్ట్ సిబ్బంది అందరూ.. వ్యాక్సిన్ వేసుకోవడం తప్పనిసరని ఆ దేశ అధ్యక్షుడు జో బైడెన్ గత నెలలో స్పష్టం చేశారు. ఈ నేపథ్యంలోనే ఐబీఎం తమ ఉద్యోగులకు ఈ సూచనలు చేసినట్లు తెలుస్తోంది.
అమెరికాలో వేల మందికి ఉపాధి కల్పిస్తున్న కంపెనీల్లో ఐబీఎం కూడా ఒకటి. ఈ సంస్థ ఇంతకుముందు కూడా.. రెండు డోసుల వ్యాక్సిన్ తీసుకున్న సిబ్బందిని మాత్రమే ఆఫీస్లకు తిరిగి వచ్చేందుకు అనుమతి ఇస్తున్నట్లు తెలిపింది. వర్క్ ఫ్రం హోం చేసే వారు కూడా వెంటనే వ్యాక్సిన్ వేసుకోవాలని సూచించింది. అయితే ఇందుకు మతపరమైన, ఆరోగ్యపరమైన మినహాయింపులు మాత్రం ఉన్నాయి.
స్వయంగా దేశ అధ్యక్షుడే ఉద్యోగులకు వ్యాక్సిన్ తప్పనిసరి అని చెప్పిన నేపథ్యంలో మిగతా కంపెనీలు కూడా ఐబీఎం బాటనే అనుసరించే అవకాశాలున్నాయనే అభిప్రాయాలు వ్యక్తమవుతున్నాయి. అయితే ఈ విషయంపై టెక్ దిగ్గజాలు ఇంకా స్పందించాల్సి ఉంది.
ఇదీ చదవండి: పెట్రోల్ బంక్ లైసెన్స్తోనే ఈవీ ఛార్జింగ్ స్టేషన్కూ అనుమతి
