భారత్-చైనా మధ్య లద్దాక్లోని సరిహద్దులో ఉద్రిక్త పరిస్థితులు నెలకొన్న తరుణంలో కీలక నిర్ణయం తీసుకుంది టెలికాం విభాగం (డాట్). ప్రభుత్వ టెలికాం సంస్థ భారత్ సంచార్ నిగమ్ లిమిటెడ్ (బీఎస్ఎన్ఎల్) 4జీ సేవల అభివృద్ధిలో చైనా ఉపకరణాలను వినియోగించొద్దని సూచించాలని నిర్ణయించినట్లు అధికార వర్గాలు తెలిపాయి.
" బీఎస్ఎన్ఎల్ 4జీ అప్గ్రెడేషన్లో చైనా పరికరాలను వినియోగించొద్దని సూచించాలని టెలికాం విభాగం చర్చల్లో నిర్ణయం తీసుకున్నారు. 4జీ టెండర్ పనుల విషయంలో పునఃపరిశీలించాలని టెలికాం శాఖ సూచించనుంది. ఇలాంటి ఆదేశాలే మహానగర్ టెలికాం నిగమ్ లిమిటెడ్ (ఎంటీఎన్ఎల్)కూ చేయనుంది. చైనాలో తయారయ్యే టెలికాం ఉత్పత్తులపై ప్రైవేటు సంస్థలు అధికంగా ఆధారపడటాన్ని తగ్గించేలా చర్యలను పరిశీలిస్తోంది. గతంలో చైనా ఉత్పత్తుల నెట్వర్క్ భద్రతపై ఆందోళనలు చెలరేగాయి."
- టెలికాం శాఖ అధికార వర్గాలు.
గాల్వన్ లోయలో సైనికుల మధ్య ఘర్షణ తలెత్తి 20 మంది భారత జవాన్లు ప్రాణాలు కోల్పోయారు. మరో 18 మంది తీవ్రంగా గాయపడ్డారు. ఈ నేపథ్యంలో భారత్లో చైనా వ్యతిరేకత పెరిగింది. సరిహద్దు ప్రతిష్టంభనకు నిరసనగా చైనా వస్తువులను నిషేధించాలని పరిశ్రమల సమాఖ్య (సీఏఐటీ) వంటి వాణిజ్య సంస్థలు సహా పలువురు ఆందోళనకారులు డిమాండ్ చేస్తున్నారు.
ఇదీ చూడండి: కరోనా రోగులకు ప్రాణదాతగా మారిన ఔషధం!
