కరోనా నేపథ్యంలో ప్రభుత్వ రంగ విమానయాన సంస్థ ఎయిరిండియా తన ఉద్యోగులకు వేతనం లేని సెలవులను మంజూరు చేసేందుకు నిర్ణయం తీసుకుంది. ఉద్యోగులకు ఆరు నెలల నుంచి రెండేళ్ల వరకు ఈ సెలవులు ఇవ్వనున్నట్లు ప్రకటించింది. ఈ సెలవులను గరిష్ఠంగా ఐదేళ్ల వరకు పొడిగించే విధంగా ప్రణాళికలు రూపొందించింది.
ఉద్యోగుల సామర్థ్యం, పనితీరు, ఆరోగ్యం వంటి అంశాలను బట్టి ఈ సెలవులు మంజూరు చేసే అధికారం ఎయిరిండియా సీఎండీ రాజీవ్ బన్సల్కు ఇస్తున్నట్లు సంస్థ తన లేఖలో పేర్కొంది. సిబ్బంది, ఆర్థిక విభాగాల జనరల్ మేనేజర్లు, డిపార్ట్మెంట్ హెడ్తో కూడిన కమిటీని ప్రాంతీయ డైరెక్టర్ ఏర్పాటు చేస్తారని ఎయిరిండియా తెలిపింది. సెలవులు కావాలనుకునే ఉద్యోగుల వివరాలను సీఎండీ అనుమతి కోసం ప్రధాన కార్యాలయానికి పంపించాలని పేర్కొంది.
"ప్రధాన కార్యాలయంలోని డిపార్ట్‌మెంటల్ హెడ్‌లు, ప్రాంతీయ డైరెక్టర్లు పైన పేర్కొన్న అంశాల ఆధారంగా ఉద్యోగులను ఎంపిక చేసి.. వారి వివరాలను సీఎండీ ఆమోదం కోసం పంపించాలి.
-ఎయిరిండియా
వేరే చోట పనిచేస్తే..!
ఈ సెలవులు తీసుకున్న ఉద్యోగులు మరేదైనా ప్రభుత్వ రంగ సంస్థల్లో పనిచేయకూడదని స్పష్టం చేసింది ఎయిరిండియా. ఇతర ఎయిర్లైన్లలో పనిచేయాలనుకుంటే సంస్థ నుంచి ముందస్తు అనుమతి తప్పనిసరిగా తీసుకోవాలని పేర్కొంది. సెలవుల్లో ఉన్నప్పుడు కూడా వైద్య ప్రయోజనాలను పొందవచ్చని స్పష్టం చేసింది.
'వ్యయాలు తగ్గించండి'
అంతకుముందు.. ప్రైవేట్ ఎయిర్లైన్ల మాదిరిగానే ఎయిరిండియా సైతం వ్యయాలను తగ్గించుకునే చర్యలు చేపట్టాలని ఎయిరిండియా పైలట్ అసోసియేషన్ సంస్థ చీఫ్ రాజీవ్ బన్సల్ను కోరింది. వేతనం లేకుండా తప్పనిసరి సెలవులు మంజూరు చేసి ఉద్యోగుల సంఖ్య తగ్గించుకోవాలని అభ్యర్థించింది. ఎయిర్లైన్ కార్యకలాపాలు పూర్తిగా ప్రారంభమయ్యే వరకు ఇలాంటి చర్యలు పాటించాలని పేర్కొంది.
ఇదీ చూడండి: దేశీయ కరోనా వ్యాక్సిన్లకు 'హ్యూమన్ క్లినికల్ ట్రయల్స్'
