''జ'గన్'​ను నమ్మొద్దు.. మోదీ ఉగ్రవాదితో సమానం''

ప్రధాని మోదీని దిల్లీ నుంచి గుజరాత్‌ పంపించేవరకూ వదిలిపెట్టనని ముఖ్యమంత్రి చంద్రబాబు అన్నారు. చిత్తూరు జిల్లా మదనపల్లెలో సీఎం ఎన్నికల ప్రచారంలో పాల్గొన్నారు. గోద్రా అల్లర్లలో 2 వేల మంది మృతికి మోదీనే కారణమన్న బాబు.. ఆయన ఓ ఉగ్రవాదితో సమానమని అన్నారు.

ప్రధాని మోదీని దిల్లీ నుంచి గుజరాత్‌ పంపించేవరకూవదిలిపెట్టేది లేదని ముఖ్యమంత్రి చంద్రబాబు చెప్పారు. మోదీ.. ఓ ఉగ్రవాదితో సమానమని అన్నారు. గోద్రా అల్లర్ల కేసులో 2 వేల మంది చనిపోయేందుకు మోదీనే కారణమని...చిత్తూరు జిల్లా మదనపల్లె తెదేపా ప్రచార సభలో చెప్పారు. యువత ఆలోచించాలని... కోడికత్తి పార్టీని నమ్ముకుంటే జైలుకు పోతారని హెచ్చరించారు. యువత భవిష్యత్‌ బ్రహ్మాండంగా తీర్చే బాధ్యత తనదని సీఎం హామీ ఇచ్చారు. ఖాళీగా ఉన్న ఉద్యోగాలన్నీ భర్తీ చేస్తానని స్పష్టం చేశారు. ప్రపంచంలో ఏ దేశానికి వెళ్లినా మోదీని బ్యాన్‌ చేసే పరిస్థితి వచ్చిందని తెలిపారు. హైదరాబాద్‌ నుంచి వలస పక్షులు వస్తున్నాయని... వారితో ప్రజలు అప్రమత్తంగా ఉండాలని సూచించారు. మోదీ, కేసీఆర్‌ నుంచి జగన్‌మోహన్‌రెడ్డికి డబ్బులు వస్తున్నాయన్నారు. రాష్ట్రంలో ఉండే పత్రికా విలేకరులందరికీ ఇళ్లు కట్టిస్తామని చెప్పారు. ఒక్కసారి గెలిపించాలని జగన్‌ అడుగుతున్నారని సీఎం అన్నారు. ఒక్కసారి అని..తినే తిండిలో విషం కలుపుకుంటామా?.. ఒక్కసారి అని కొండ పైకెక్కి లోయలో దూకుతామా? అని ప్రశ్నించారు. జగన్‌పేరులోనే 'గన్‌' ఉందనీ.. ఆయనతో చాలా జాగ్రత్తగా ఉండాలని కోరారు. తాను అధికారంలోకి వస్తే నీళ్లు తెప్పిస్తానని ప్రజలకు భరోసా ఇచ్చారు. లేకుంటే నీళ్లబదులు కన్నీళ్లు కారే పరిస్థితి నెలకొంటుందని సీఎం హెచ్చరించారు. ఓటు వేసే ముందు అభివృద్ధి చూసి తెదేపాను గెలిపించాలని కోరారు.