'విశాఖ ఉత్తరంలోని 5 కేంద్రాల్లో రీపోలింగ్ జరపాలి'

విశాఖ ఉత్తర నియోజకవర్గం కౌంటింగ్​లో అధికారులు నిర్లక్ష్యంగా వ్యవహించారని వైకాపా నేత బొత్స ఆరోపించారు. వీవీ ప్యాట్, ఈవీఎం ఓట్లు తేడా వచ్చిన 5 కేంద్రాల్లో రీపోలింగ్ నిర్వహించాలని ఈసీని డిమాండ్ చేశారు. అందుకుగాను సీఈవో ద్వివేదిని కలిసి వినతిపత్రం అందజేశారు.

రాష్ట్ర ఎన్నికల ప్రధానాధికారి గోపాల కృష్ణ ద్వివేదిని వైకాపా నేత బొత్స సత్యనారాయణ కలిశారు. విశాఖ ఉత్తర నియోజకవర్గంలో ఈవీఎం వీవీప్యాట్ ఓట్ల తేడాపై ఆయన ఈసీకి ఫిర్యాదు చేశారు. నియోజకవర్గంలోని 5 కేంద్రాల్లో వీవీప్యాట్, ఈవీఎం ఓట్లలో వ్యత్యాసం వచ్చిందన్న బొత్స...ఆ స్థానాల్లో రీపోలింగ్ జరపాలని ఈసీని కోరారు. కౌంటింగ్​కు నాలుగు రోజుల ముందు ఆర్వోని మార్చటంపై అభ్యంతరం తెలిపారు.

ఉద్దేశపూర్వకంగానే అధికారులు అవకతవకలకు పాల్పడ్డారని బొత్స ఆరోపించారు. తమకు న్యాయం చేయాలని ఈసీకి వినతి పత్రం అందించారు. ఓటింగ్ రోజు ఈవీఎంల సమస్యతో మరో ఈవీఎం పెట్టామన్న అధికారులు వీవీప్యాట్ స్లిప్పులు సరిపోల్చడంలో విఫలమయ్యారని ఆరోపించారు. అధికారులు తెదేపా అభ్యర్థితో కుమ్మక్కై ఈవీఎం మాయం చేశారన్నారు.