ఖలిస్థానీ అనుకూల 'వారీస్ పంజాబ్ దే' అధినేత అమృత్పాల్ సింగ్పై ఉక్కుపాదం మోపేందుకు పంజాబ్ పోలీసులు సిద్ధమయ్యారు. అతడిని అరెస్టు చేసేందుకు భారీ ఆపరేషన్ చేపట్టారు. ఇటీవల అజ్నాలా పోలీస్ స్టేషన్ వద్ద విధ్వంసం సృష్టించిన కేసులో ఆయన్ను అదుపులోకి తీసుకునేందుకు ప్రయత్నించారు. అయితే, అమృత్పాల్ పరారీలో ఉన్నాడని పోలీసులు పేర్కొన్నారు. అమృత్పాల్ను అనుసరిస్తున్న 78 మందిని అరెస్టు చేసినట్లు చెప్పారు. విచారణ నిమిత్తం మరికొంత మందిని అదుపులోకి తీసుకున్నట్లు వెల్లడించారు.
తనను అరెస్టు చేసేందుకు పోలీసులు వస్తున్నారనే సమాచారంతో అమృత్పాల్ పారిపోయినట్లు సంబంధిత వర్గాలు తెలిపాయి. దాదాపు 100 వాహనాలతో పోలీసులు అతడిని వెంబడించినట్లు సమాచారం. చివరకు జలంధర్లోని నాకోదార్ ప్రాంతంలో అతడిని అరెస్టు చేసినట్లు తొలుత వార్తలు వచ్చాయి. అయితే, పోలీసులు మాత్రం అతడు పరారీలోనే ఉన్నాడని తెలిపారు. అతడి అనుచరులు నుంచి భారీగా ఆయుధాలను స్వాధీనం చేసుకున్నట్లు సమాచారం.
పక్కా ప్లాన్తో అరెస్ట్
బఠిండా జిల్లాలోని జలంధర్-మొగా జాతీయ రహాదారిపై అమృత్పాల్ కార్యక్రమం నిర్వహిస్తున్నాడని పోలీసులకు సమాచారం అందింది. ఈ క్రమంలోనే అతడిని అరెస్ట్ చేసేందుకు జలంధర్, మొగా పోలీసులు సంయుక్తంగా ఆపరేషన్ను చేపట్టారు. పెద్ద ఎత్తున బలగాలను మోహరించారు. శనివారం జలంధర్ దాటగానే.. పోలీసులు అతడి కాన్వాయ్ను అడ్డకున్నారు. దీనిని గమనించిన అమృత్పాల్ డ్రైవర్ లింక్రోడ్కు మళ్లించి తప్పించుకునే ప్రయత్నం చేశాడు. దీంతో అతడి కాన్వాయ్ను పోలీసులు వెంబడించారు. అతడిని పట్టుకునేందుకు సుమారు 8 జిల్లాల పోలీసులు రంగంలోకి దిగారు.
మరోవైపు, పంజాబ్లోని పలు జిల్లాలో ఆదివారం వరకు ఇంటర్నెట్ సర్వీసులు తాత్కాలికంగా నిలిపివేయాలని పోలీసులు ఆదేశించారు. రాష్ట్ర ప్రజలు ఎలాంటి హింసకు పాల్పడకుండా, శాంతియుతంగా ఉండాలని పంజాబ్ పోలీసులు కోరారు. విద్వేషపూరిత ప్రసంగాలు, ఫేక్ న్యూస్ ప్రచారం చేయవద్దంటూ పౌరులకు విజ్ఞప్తి చేశారు. అంతకుముందు, పోలీసులు మమల్ని వెంటాడుతున్నారంటూ ఓ వీడియోను సోషల్ మీడియాలో విడుదల చేశాడు 'వారీస్ పంజాబ్ దే' సంస్థ చీఫ్ అమృత్పాల్ సింగ్. అతడు కూర్చుని ఉండగా.. అతడి మద్దతుదారులు వీడియో తీశారు.
గతనెలలో 'వారీస్ పంజాబ్ దే' అధినేత అమృత్పాల్ మద్దతుదారులు వీరంగం సృష్టించారు. అజ్నాలా పోలీస్ స్టేషన్ వద్ద విధ్వంసం సృష్టించి.. తమ మద్దతుదారుడిని విడుదల చేయించుకున్నారు. అమృత్పాల్ పిలుపుతో.. వేలాది మంది అనుచరులు తల్వార్లు, తుపాకులతో అజ్నాలా పోలీస్ స్టేషన్ను ముట్టడించారు. అమృత్పాల్ సింగ్ సన్నిహితుడు లవ్ప్రీత్ తుఫాన్ అరెస్టుకు నిరసనగా వారంతా ఇలా ఆందోళన చేపట్టారు. ఈ తరుణంలోనే ఆయుధాలతో పెద్ద సంఖ్యలో పోలీస్ స్టేషన్కు చేరుకున్న మద్దతుదారులు తల్వార్లతో పోలీసులపై దాడి చేస్తూ స్టేషన్లోకి చొచ్చుకెళ్లారు. ఆందోళనకారుల్ని కట్టడి చేసేందుకు పోలీసులు తీవ్రంగా ప్రయత్నించినా ఫలితం లేకుండా పోయింది. నిరసనకారుల దాడిలో పలువురు పోలీసులకు గాయాలయ్యాయి. వీరి ఆందోళనలకు తలొగ్గిన పోలీసులు.. లవ్ప్రీత్ తుఫాన్ను విడుదల చేశారు. అయితే, పంజాబ్ పోలీసులు మాత్రం.. తమకు సమర్పించిన ఆధారాలను పరిగణనలోకి తీసుకున్న తర్వాతే లవ్ప్రీత్ను విడుదల చేశామని అమృత్సర్ ఎస్ఎస్పీ వెల్లడించారు. ఈ వ్యవహారంపై స్పెషల్ ఇన్వెస్టిగేషన్ టీమ్ను ఏర్పాటు చేసినట్లు తెలిపారు. కేసుపై దర్యాప్తు కొనసాగుతుందని వివరించారు.
వివాదాల అమృత్!
'వారీస్ పంజాబ్ దే'ను ఖలిస్థాన్ అనుకూల సంస్థగా చెబుతుంటారు. మత బోధకుడిగా చెప్పుకునే ఆ సంస్థ అధినేత అమృత్పాల్ సింగ్ ఇప్పటికే అనేక వివాదాల్లో చిక్కుకున్నారు. దొంగతనం, కిడ్నాప్, హింసకు పాల్పడటం వంటి కేసులు అతడిపై నమోదయ్యాయి.
ఇవీ చదవండి : రాళ్లు రువ్వుకున్న బీజేపీ, కాంగ్రెస్ కార్యకర్తలు.. ఫ్లెక్సీ వివాదమే కారణం
ఘనంగా బావి-తోట పెళ్లి.. 1500 మంది అతిథులు.. ప్రభుత్వ ఉద్యోగులు సైతం!
