దక్షిణ భారతదేశంలో మొదటి వందేభారత్ రైలు పట్టాలపై పరుగులు పెట్టనుంది. నవంబర్ 11 న ప్రధాని నరేంద్ర మోదీ బెంగళూరులో దీన్ని ప్రారంభించనున్నారు. చెన్నై, బెంగుళూరు, మైసూర్ల మీదుగా ఈ రైలు నడవనుంది. ప్రారంభోత్సవానికి ముందు ట్రయల్ రన్ చేపట్టగా... చెన్నై నుంచి మైసూరుకు కేవలం ఆరు గంటల్లోనే రైలు చేరుకుందని అధికారులు తెలిపారు.
ఉదయం 6 గంటలకు చెన్నై నుంచి ఈ రైలు బయలుదేరింది. 504 కిలోమీటర్ల దూరం ప్రయాణించిన అనంతరం మైసూర్కు చేరుకుంది. ఈ ప్రయాణానికి 6 గంటల 12 నిమిషాల సమయం పట్టింది. ఈ రైలుకు అన్ని పరీక్షలు విజయవంతంగా పూర్తి చేసినట్లు రైల్వే టెక్నికల్ విభాగం అధిపతి అఖిల రంజన్ తెలిపారు. ఇందులో ఎలాంటి సాంకేతిక సమస్యలు తలెత్తలేదన్నారు. ఈ వందే భారత్ రైలును దేశీయంగా అభివృద్ధి చేసినట్లు పేర్కొన్నారు.
ఈ వందేభారత్ ప్రత్యేకతలు
1. ఈ హై-స్పీడ్ రైలులో ప్రత్యేకంగా రూపొందించిన బోగీలు ఉంటాయి.
2. రైలులోని అన్ని బోగీలలో ఏసీలు ఉంటాయి.
3. ప్రతి కంపార్ట్‌మెంట్ ఒక ఆటోమేటిక్ డోర్ కలిగి ఉంటుంది.
4. ప్రతి బోగీలో సీసీటీవీలు ఉంటాయి.
5. చివరి రెండు బోగీలలో 360 డిగ్రీలు తిరిగే సీట్లతో విలాసవంతమైన సీటింగ్ అరేంజ్మెంట్స్ ఉంటాయి.
