ఓ చిన్నారి పట్ల అమానుషంగా (child bullying) ప్రవర్తించాడో వ్యక్తి. నాలుగేళ్ల బాలుడిని అపహరించి.. నోట్లో తుపాకీ పెట్టి బెదిరించాడు. ఉత్తర్ప్రదేశ్ మొరాదాబాద్‌ జిల్లా దిలారి ప్రాంతంలోని ఇలార్ అనే గ్రామంలో ఈ ఘటన జరిగింది.
'చిన్నారికి తల్లి లేదని.. ఈ వీడియో తనకు వాట్సాప్లో వచ్చిందని' బంధువు విజేంద్ర తెలిపారు. పోలీసులకు ఫిర్యాదు చేసినప్పటికీ నిందితునిపై సరైన చర్యలు తీసుకోవట్లేదని ఆరోపించారు. కఠినంగా శిక్షించాలని ఉన్నతాధికారులకు ఫిర్యాదు చేశారు.
"గ్రామంలో పలుకుబడి ఉన్న వ్యక్తి బాలుడిని కిడ్నాప్ చేశాడు. నాలుగేళ్ల చిన్నారిని నోరు తెరవాలని బెదిరించాడు. నోట్లో తుపాకీ పెట్టి, మంచం మీద పడేసి.. కొడుతున్న వీడియో వాట్సాప్లో వచ్చింది. తల్లి లేని చిన్నారిని హింసించారు. పోలీసులు ఇది చాలా చిన్న కేసు అంటున్నారు. అందుకే ఎస్పీని కలిసేందుకు వచ్చా. బాలుడిని విడిపించకపోతే డీఐజీ కార్యాలయానికి కూడా వెళ్తా.
--విజేంద్ర, చిన్నారి బంధువు
వీడియోలోని మాటల ఆధారంగా బాలుడిని అపహరించింది అజిత్ అనే వ్యక్తిగా ఆరోపించారు బాధితుడి బంధువు విజేంద్ర. ఊరిలో పలుకుబడి ఉన్న వ్యక్తి కాబట్టే పోలీసులు ఎలాంటి చర్యలు తీసుకోవటం లేదని వాపోయారు.
మరోవైపు.. గ్రామానికి చెందిన ఓ యువకుడు చిన్నారితో అసభ్యంగా ప్రవర్తించినట్లు సమాచారం అందిందని సీఐ అనూప్ కుమార్ తెలిపారు. నిందితుడు అజిత్‌ను అరెస్ట్ చేసి జైలుకు తరలించినట్లు వివరించారు.
సామాజిక మాధ్యమాల్లో వైరల్గా మారిన ఈ ఘటనపై స్థానికులు ఆగ్రహం వ్యక్తం చేస్తున్నారు. చిన్నారితో అలా ప్రవర్తించడమేంటని మండిపడుతున్నారు.
ఇవీ చదవండి: కూలీ డబ్బులు అడిగినందుకు చేయి నరికేసిన యజమాని
