వడ.. భారతీయ సంస్కృతిలో ఓ ప్రత్యేక వంటకం. ఈ విశాల భారతదేశంలో ఒక్కో చోట ఒక్కో రకంగా వడ తయారు చేస్తారు. కానీ అందులో మనకు తెలిసినవి కొన్నే కదా! అయితే.. అన్నింటినీ మనకు పరిచయం చేసే ప్రయత్నం చేసింది ఉత్తరాఖండ్కు చెందిన ఓ హోటల్. దాదాపు 551 వడలను తయారు చేసి లిమ్కా బుక్ ఆఫ్ రికార్డ్స్కు ప్రదర్శనగా పెట్టింది.
ఆ ఉద్దేశంతోనే..
భారతదేశంలో తయారు చేసే వడలన్నింటినీ ఒకే చోట ఉంచాలనే సత్సంకల్పంతో ఈ కార్యక్రమానికి శ్రీకారం చుట్టినట్లు నిర్వాహకులు స్మృతి హరి తెలిపారు. భారతీయ వడల గురించి ప్రపంచానికి తెలియపరచాలని ఇలా చేసినట్లు వెల్లడించారు. దాదాపు రెండేళ్ల క్రితం నుంచే ఈ ప్రదర్శన చేయాలని ప్రయత్నిస్తున్నట్లు తెలిపారు.
"దేశంలో చాలా రకాల వడలు ఉన్నాయి. అవి ఈ దేశ సంస్కృతిలో భాగం. కానీ వీటిని ప్రచారం చేయకపోవడం వల్ల మరుగున పడిపోతున్నాయి. ఇలాంటి కార్యక్రమాలు ప్రపంచవ్యాప్తంగా ఉన్న భారతీయులను ఆకర్షిస్తాయి. లిమ్కా బుక్ ఆఫ్ రికార్డ్స్లో ఈ కార్యక్రమానికి చోటు దక్కుతుందని భావిస్తున్నా."
-రాజీవ్ బడోలా, షెఫ్
51 వడాలు అక్కడి నుంచే..
ఈ వడలను తయారు చేయడానికి దాదాపు 300 పదార్థాలు వాడినట్లు నిర్వహకులు తెలిపారు. అయితే.. కేవలం ఉత్తరాఖండ్ నుంచే 51 వడలను తయారుచేసినట్లు పేర్కొన్నారు. ఇవి ఈ ప్రదర్శనకు ప్రధాన ఆకర్షణగా నిలిచాయని అన్నారు.
ఇదీ చదవండి:'అయోధ్య'ను తలపించేలా గణేశ్ ఆలయం
