నేరాలకు పాల్పడితే ఎన్కౌంటర్ చేస్తామంటూ.. ఉత్తర్ప్రదేశ్ ముఖ్యమంత్రి యోగి ఆదిత్యనాథ్ చేసిన హెచ్చరికలు నేరగాళ్ల గుండెల్లో రైళ్లు పరిగెత్తిస్తున్నాయి. ఓ హత్య కేసులో నిందితుడిగా ఉన్న వ్యక్తి భయంతో మెడలో ఓ బోర్డు తగిలించుకుని పోలీస్ స్టేషన్కు వచ్చాడు. తాను లొంగిపోతానని, జీవితంలో మరోసారి నేరాలకు పాల్పడనని, తనను ఎన్కౌంటర్ చేయొద్దని అట్టపైన రాసి మెడలో వేసుకున్నాడు. ఈ ఘటన గాజియాబాద్లో జరిగింది.
లోని బోర్డర్ పోలీస్ స్టేషన్ పరిధిలో సెప్టెంబర్ 9న ఓ హత్య జరిగింది. ఈ ఘటనపై కేసు నమోదు చేసుకున్న పోలీసులు.. దర్యాప్తు చేపట్టారు. అనంతరం ఇద్దరు నిందితులను అరెస్ట్ చేయగా.. మరొకరు పరారీలో ఉన్నాడు. ప్రభుత్వ ఆదేశాల ప్రకారం అవసరమైతే నిందితుడిని ఎన్కౌంటర్ చేస్తామని హెచ్చరించారు జిల్లా ఎస్పీ. దీంతో హడలిపోయిన నిందితుడు సొహైల్.. తాను జీవితంలో మరోసారి నేరం చేయనని.. తనను ఎన్కౌంటర్ చేయవద్దని మెడలో బోర్డు తగిలించుకుని వచ్చి పోలీస్ స్టేషన్లో లొంగిపోయాడు.
అంతకుముందు ఓ మహిళతో సంబంధం పెట్టుకుని హత్య చేసిన కేసులోనూ సొహైల్ నిందితుడిగా ఉన్నాడు. ఇలాంటి నేరాలకు పాల్పడుతున్న నిందితులను వదిలిపెట్టమని.. వారిపై కఠిన చర్యలు తీసుకుంటామని పోలీసులు హెచ్చరించారు.
ఇవీ చదవండి: గుజరాత్కు కేజ్రీవాల్.. వచ్చిన కాసేపటికే ఆప్‌ ఆఫీసులో సోదాలు!
చిన్న మెసేజ్తో సీరం సంస్థకు టోకరా.. నిమిషాల్లోనే రూ.కోటి స్వాహా!
