చిన్నారులపై జరుగుతున్న హింసను కట్టడి చేయటం, ముఖ్యంగా ఆన్లైన్ భద్రతపై ప్రత్యేకంగా దృష్టిసారించేందుకు జట్టుకట్టాయి ఐక్యరాజ్య సమితి చిన్న పిల్లల విభాగం.. యూనిసెఫ్ ఇండియా, ఫేస్బుక్. ఈ అంశంపై ఏడాది పాటు కలిసి పనిచేయనున్నాయి.
ఆన్లైన్ సహా ఆఫ్లైన్లోనూ చిన్నారులకు సురక్షితమైన వాతావరణాన్ని కల్పించటమే ఈ భాగస్వామ్య ముఖ్య ఉద్దేశమని యూనిసెఫ్ ప్రకటించింది. డిజిటల్ ప్రపంచాన్ని సురక్షితంగా పొందేందుకు చిన్నారుల సామర్థ్యాన్ని పెంపొందించటం, చిన్నారులపై జరుగుతున్న హింస, పిల్లలు, కుటుంబాలు, సమాజం మీద దాని ప్రభావంపై అవగాహన కల్పించనున్నట్లు తెలిపింది. అలాగే.. చిన్నారుల హింసపై పోరాడుతున్న కార్యకర్తలు, వివిధ విభాగాలకు నైపుణ్యాభివృద్ధితో సమస్యను మరింత సమర్థవంతంగా అడ్డుకోనున్నట్లు పేర్కొంది. ఈ భాగస్వామ్యంలో దేశవ్యాప్తంగా సామాజిక మాధ్యమాల ప్రచారం సహా.. ఆన్లైన్ భద్రత, డిజిటల్ అక్షరాస్యత, మానసిక సామాజిక మద్దతుపై 1,00,000 మంది పాఠశాల విద్యార్థుల సామర్థ్యం పెంపునకు కృషి చేయనున్నట్లు తెలిపింది యూనిసెఫ్.
వర్చువల్గా జరిగిన ఈ కార్యక్రమానికి కేంద్ర మహిళా, శిశు సంక్షేమ శాఖ సంయుక్త కార్యదర్శి ఆస్తా సక్సేనా, ఫేస్బుక్ ప్రతినిధి మధు సిరోహి, యూనిసెఫ్ ఇండియా డిప్యూటీ ప్రతినిధి యాసుమాసా కిమురా హాజరయ్యారు.
" గత ఏడాదిన్నరలో చిన్నారుల చదువుల కోసం అంతర్జాలం వినియోగంలోకి వచ్చింది. సమయం, భౌగోళిక అండ్డంకులను తొలగించటం ద్వారా.. ఎక్కువ మంది చిన్నారులు వినియోగిస్తున్నారు. ఆన్లైన్లో ఉన్న వనరుల ద్వారా నైపుణ్యాలు సంపాదించేందుకు ప్రోత్సహిస్తున్న క్రమంలోనే.. ఆన్లైన్ ద్వారా ఎదురయ్యే ముప్పును కూడా మనం గ్రహించాలి. ఆన్లైన్, ఆఫ్లైన్ ద్వారా ఎదురయ్యే హింసను ఎదుర్కొనే అవకాశాలను కరోనా మహమ్మారి పెంచిందనే చెప్పాలి. చిన్నారులపై జరుగుతున్న హింసను కట్టడి చేసేందుకు ప్రయత్నాలను మనం గుర్తించాలి. అవగాహన కల్పించేందుకు వివిధ వర్గాలకు చెందిన వారు ఏకతాటిపైకి రావటం కీలకం,"- ఆస్తా, సక్సేనా, కేంద్ర మహిళా, శిశు సంక్షేమ శాఖ సంయుక్త కార్యదర్శి.
ఆన్లైన్ ద్వారా ఎదురయ్యే ముప్పు నుంచి చిన్నారులను రక్షించుకోవటం మనందరి బాధ్యతగా పేర్కొన్నారు ఫేస్బుక్ ప్రతినిధి సిరోహి. ఈ బాధ్యతను తీవ్రంగా పరిగణించాలని సూచించారు. చిన్నారులకు సురక్షితమైన ఆన్లైన్ కోసం కొన్ని సంవత్సరాలుగా తల్లితండ్రులు, ప్రభుత్వాలు, నిపుణులతో కలిసి పని చేస్తున్నట్లు చెప్పారు.
ఇదీ చూడండి: పావు వంతు ఇళ్లకే ఇంటర్నెట్ సౌకర్యం: యునిసెఫ్
