బిహార్లో ఓ దొంగల ముఠా ఏకంగా ట్రైన్ ఇంజిన్కే చోరీ చేసింది. పక్కాప్లాన్తో ఓ సొరంగ మార్గాన్ని ఏర్పాటు చేసుకుని ఈ చోరీకి పాల్పడింది. ఈ కేసు విషయంలో రంగంలోకి దిగిన పోలీసులు ఆ ముఠా నాయుకుడితో పాటు మరికొంత మంది దొంగల్ని పట్టుకున్నారు. వారిచ్చిన సమాచారంతో దాదాపు రూ. 30 లక్షల విలువైన ట్రైన్ ఇంజిన్ భాగాలను స్వాధీనం చేసుకున్నారు. దీనిపై స్పందించిన రైల్వే అధికారులు మాత్రం.. ఇదంతా నిజం కాదని అంటున్నారు.
అసలు ఏం జరిగిందంటే..
బెగుసరాయ్ జిల్లా బరౌనీ ప్రాంతంలోని గర్హరా రైల్వేయార్డ్లో మరమ్మతులకోసం తీసుకువచ్చిన ఓ ట్రైన్ ఇంజిన్ను.. దొంగలు మాయం చేశారు. దొంగలు ఈ ఇంజిన్ను వారం రోజుల్లో కొన్ని ముక్కలుగా చేసి ఎత్తుకుపోతూ.. చివరకు ఇంజిన్నే లేకుండా చేశారు. ఈ చోరీ కోసం ఆ దొంగల ముఠా ప్రత్యేక సొరంగ మార్గాన్ని కూడా ఏర్పాటు చేసుకున్నారు. ఆ మార్గంగుండా వారు బస్తాలతో ఇంజిన్లోని రాగితీగలు, అల్యూమినియం ప్లేట్లను దొంగలించి.. వివిధ జిల్లాలోని స్క్రాప్ దుకాణాల్లో అమ్మేశారు.
దీనిపై కేసు నమోదు చేసుకున్న పోలీసులు, రైల్వే స్పెషల్ విజిలెన్స్ బృందం నవంబర్ 18న గర్హరా పరిసర ప్రాంతాల్లోని కొన్ని స్క్రాప్ గోడౌన్లపై దాడులు చేశారు. ఈ దాడుల్లో ట్రైన్ ఇంజిన్కు సంబంధించిన కొన్ని భాగాలను స్వాధీనం చేసుకున్నారు. ఆ దాడుల్లో భాగంగా దొంగల ముఠా నాయకుడు చందన్కుమార్తో పాటుగా.. మరో ఇద్దరు దొంగల్ని పట్టుకున్నారు. వారిని విచారించగా.. ఆ సమాచారంతో ముజఫర్‌పుర్‌ జిల్లాలోని ఓ గోడౌన్పై దాడి చేసి దాదాపు రూ.30 లక్షల విలువ చేసే 13 బస్తాల ఇంజిన్ విడిభాగాలను స్వాధీనం చేసుకున్నారు. గోడౌన్ యజమానికి ముందుగానే దాడుల సమాచారం తెలియడం వల్ల పోలీసులకు చిక్కకుండా తప్పించుకున్నాడు. అయితే ఈ ముఠాతో పాటు మరికొంత మంది ఈ దొంగతనాలకు పాల్పడతున్నట్లు పోలీసులు గుర్తించారు. తూర్పు మధ్య రైల్వే అధికారులు ఈ వార్తలపై స్పందించారు.
"రైల్ ఇంజిన్ చోరీ వంటి సంఘటన ఏదీ జరగలేదు.. ఇది ఫేక్ న్యూస్. బరౌని స్టేషన్ సమీపంలో ఒక స్పేర్ రైల్ ఇంజిన్ ఉంచాం. దొంగలు అందులోకి ప్రవేశించి కొన్ని కేబుళ్లను అపహరించారు. ఈ కేసులో పది రోజుల క్రితం.. కొందరు దొంగలను అరెస్ట్ చేశాం. అక్కడ సొరంగం లేదు. సరిహద్దు దగ్గర కొంత మట్టిని తొలగించడం వల్ల.. గొయ్యి వంటి చిన్న మార్గం ఏర్పడింది. అసలు ఇంజిన్ దొంగతనం జరగలేదు. కేబుల్ దొంగిలించిన దొంగలందరినీ అరెస్టు చేశాం."
-- బీరేందర్ కుమార్, సీపీఆర్ఓ, తూర్పు మధ్య రైల్వే
